Колхида ойпаты

Колхоида ойпаты, Риони ойпаты (ежелгі колхи тайпасының атымен аталған) – Грузия жерінде, Үлкен Кавказ, Лиа және Кіші Кавказ жоталарының аралығында, Қара теңіз жағалауы мен Риони өзенінің төменгі ағысында орналасқан тауаралық ойпаңдағы аллювийлік жазық. Абсалют биіктігі 150 м-ге дейін жетеді. Ойпатты Риони, Ингури, Кодори, т.б. өзендер басып ағады. Климаты ылғалды, субтропиктік. Ең суық айдың (қаңтар) орташа температурасы 4 – 6С. Жазы қоңыржай жылы, 22 – 23С. Жылдық жауын-шашынның орташа мөлшері 1200 – 1800 мм, жыл маусымдарында біркелкі түседі. Табиғи күйінде қатты батпақтанған. Құрғату жұмыстары жүргізілгеннен кейін де бірқатар аудандарда батпақ кең көлемде сақталған. Ойпаттың батысында қандыағаш ормандары мен батпақтар таралған. Біршама биіктеу алқаптарда бұрын шәмшат, граб, емен ормандары өскен. Таулардың етегіне қарай, әсіресе, шығыс аудандарда жалпақ жапырақты ормандар басым. Оларға мәңгі жасыл бұталар, лианалар және эпифиттер тән. Колхоида ойпаты субтропиктік дақылдар өсірілетін маңызды аудан. Шай бұтасы, цитрус (мандарин, апельсин, лимон) плантациялары көп жерін қамтиды. Қара теңіз жағалауын тұтас бойлап курорттар салынған. Ойпаттың ерекше субтропиктік табиғат кешендерін қорғау үшін арнаулы қорық ұйымдастырылған.

Пайдаланған әдебиет

Қазақ Энциклопедиясы, 10 - том