Күмісай Асанова

Күмісай Асанова (26.9.1926 ж.т., Қызылорда облысы Қазалы ауданы) — халық ағарту ісінің үздігі.

1930-шы жылдардағы ашаршылық жылдарында ата-анасынан ерте айырылып, 1932 - 1942 ж. Қазалы, Сайрам, Бостандық балалар үйінде тірбиеленген. 1942 ж. Шымкенттегі бастауыш сынып мұғалімдерін даярлайтын курсты, 1945 ж. осындағы оқытушылар институтын бітірді.

1945-1947 ж. Қызылорда облысы Қармақшы ауданы оқу бөлімінде инстпектор, балалар үйі директорының орынбасары болып еңбек етті. Қызылорда педагогикалық институтта оқыды. 1949 жылдан Жамбыл облысы Қордай ауданы Ақтерек ауылындағы орта мектепте қазақ тілі мен әдебиеті пәнінің мұғалімі болып жұмыс істеді. 1950 - 1954 ж. Қордай аудандық партия комитетінің әйелдер арасындағы жұмыс бөлімінің меңгерушісі, 1954 - 1958 ж. аудан орталығындағы қазақ орта мектебінде директордың орынбасары, 1958-1961 ж. Шу аудан ортылығындағы орта мектепте, 1961 - 1985 ж. Тараз қаласындағы А.С. Макаренко атындағы облыстық мектеп-интернатта диреткордың оқу-тәрбие ісі жөніндегі орынбасары қызметін атқарды.

Зейнеткерлік демалысқа шыққаннан кейін 1997 жылға дейін Тараз қаласындағы Керімбай орта мектебінде қазақ тілі мен әдебиеті пәнінен сабақ берді. Асанова Күмісай Құрмет грамотасымен, медальдармен марапатталды. ҚР Президентінің Жарлығымен "Қазақстан Республикасының еңбек сіңірген қызметкері" деген құрметті атақ берілді. Сонымен қатар бұл кісі "Күміс алқа", I және II дәрежелі "Ана даңқы" ордендерінің иегері.