Кәріздегіш машиналар

Кәріздегіш машиналар, дренаждау машиналары — құрғатылуға тиісті жерлерді кәріздеуге (дрендеуге) арналған машиналар.

Олар грунтты қазу тәсіліне (траншеялы, енсіз траншеялы, траншеясыз) қарай ажыратылады. Траншеялы кәріздеу тәсілінде жұмыстық бөлігі көп шөмішті болып келген шынжыр табанды өздігінен жүретін дрендеу машиналары қолданылады. Мұндай дрендеу машиналары траншея қазу, сүзгілер мен дрендеу құбырларын орнату жұмыстарын өзі атқарады. Енсіз траншеялы кәріздеу (ені 25 см-ге дейін) тәсілінде керамикалық немесе пластмасса құбырларды төсеу траншея қазумен бір мезгілде жүргізіледі және траншея табанының еңістігі автоматты түрде реттеліп отырады. Оған жұмыстық бөлігі шынжырлы, шөмішті не күректі, роторлы және шнекті, т.б. болып келетін көп шөмішті енсіз траншея қазуға арналған экскаваторлар пайдаланылады.

Траншеясыз кәріздеу тәсілінде пластмасса құбырлар машинаның тұтқалы пышағымен қазылған (2,5 м тереңдікке дейін) жіңішке қуысқа салынады. Жер астын кеулей жыртып кәріздейтін машиналар да бар. Олардың жұмыстық бөлігі — ұшында шарнирлі не троспен бекітілген дрендеуіш пышақ грунтты кеулей қазып, грунтта қуыс (дрен) қалдырып отырады.