Көрпеш Көшерұлы

Көрпеш Көшерұлы (шамамен 1870 жылдардың орта тұсы, қазіргі Қордай ауданы Сұлутөр өңірі – 1932, сонда) – ақын. Көрпеш атақты Тәкен салдың немере інісі.

Дулат тайпасының Жаныс руынан.

Ол Тәкен сал секілді бар шаруаны жиып қойып, ақындық өнер соңына түспеген. Әкесінің жолын қуып, диқаншылықпен айналысқан. Оның үстіне әйелі жыл сайын құрсақ көтеріп, 12 бала тапқан. Шиеттей бала-шағаның қамы да оның өнер жолына біржолата түсуіне жол бермесе керек. Көрпеш өлеңді әдейілеп шығармаған. Көбіне әлде бір оқиғаға байланысты табан астында суырып салып, айтатын болған. Тек жиын-тойларда шаршы топтың алдында айтысқа түсіп, өнерін паш еткен. Көрпештің бізге жеткен «Биылғы жыл – жыл қоян», «Ыспанбаймен қақтығысы», «Исабекпен қақтығысы», «Садырбай молдаға айтқаны», «Құсайынға», «Митьканы сыбауы» сияқты туындылары әлдебір оқиғаға байланысты шыққан. Көрпеш айтыс ақыны ретінде де халыққа кеңінен танылған. Оның айтыстарының ішінде Шарбан Сұлтанғазықызымен айтысы ғана біршама толығырақ жазылып алынған. Шарбанның ауылында, Қалғұты өзені бойында өткен бұл айтыс өзінің мазмұны, көркемдік ерекшелігі жағынан құнды айтыстар қатарынан саналады.

1932 жылы ашаршылық құрбаны болды. Оның отбасынан ашаршылықтан Қаламзия деген қызы ғана тірі қалған.

Шығармалары

Ысқақбай М., Шығарма шырайы – шындық, А., 1994.