Леонид Николаевич Макеров

Леонид Николаевич Макеров(5.6.1922, Ресей, Киров облысы,Лебяжье ауданы,Комлеводер селосы - 5.10.1954, Қостанай қаласы) - 2-дүниежүзілік соғысқа қатысушы, ұшқыш, әуе полкі командирінің көмекшісі. Кеңес әскері қатарына 1940 жылы шақырылды. 1942 жылдан Макеров Батыс, Ленинград және 1-Беларусь майдандарында болды. Алғашқы жауынгерлік тапсырманы 566-әуе шабуылы полкінде жасады. 1942 жылдың 20 тамызынан 1945 жылдың15 ақпанына дейін ол 133 рет ұшып шығып, жауынгерлік тапсырманы сәтті орындады. Оның батыл соққысы нәтижесінде жаудың көптеген әскері мен техникалары жойылды. Жауынгерлік тапсырмаларын орындағаны және қайсарлығы мен ерлігі үшін Макеровке КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (19.4.1945). Ленин, 3 рет Қызыл Ту, Александр Невский, 1-дәрежелі Отан соғысы және «Қызыл Жұлдыз» ордендерімен, медальдармен марапатталды. Соғыстан кейін Қостанай қаласында тұрып жұмыс істеген.