Марштық қозғалтқыштар

Марштық қозғалтқыштар (орыс. Маршевые двигатели) — ұшу аппараты (мысалы , ракетаның) траекториясының бүкіл белсенді бөлігінде жұмыс істейтін ракета қозғалтқыштары.

Олар қозғалыс энергиясының басым (көбінесе бүкіл) бөлігін береді. Марштық қозғалтқыштар негізгі қозғалтқыш ретінде ұрыстық зерттеу және ғарыштық ракеталарда, реактивтік торпедаларда, ұшақтарда (ракетопландарда) және басқа ұшу аппараттарында орнатылады. Марштық қозғалтқыштардың жұмыс уақыты ұшу аппараттарында орналасқан өзге күш қондырғыларынан айтарлықтай ұзақ. Егер ракета кеп сатылы болса, оның әрбір сатысының марштық қозғалтқыштары болады. Ұшу аппараттарының корпусында қатты тіреуіші бар марштық қозғалтқыш көп жағдайда аппараттың артқы бөлігінде немесе сатысында (көп сатылы ракетада) орналасады. Баллистикалық ракеталарда, әдетте, ракеталық марштық қозғалтқыштар, ал қанатты ракеталарда әуе-реактивтік марштық қозғалтқыштар орнатылады.