Миниатюралық театр

Миниатюралық театр – көлемі шағын, әр түрлі жанрдағы әдеби шығармаларды (бір актілі пьеса, қоғамдық - саяси сатира, пародия, скетч, т.б.) сахналайтын театр түрі.

Театр

Алғаш 20 ғасырдың басында ресейлік З.В. Холмская мен А.Р. Кугель Санкт-Петербургте “Қисық айна” (“Кривое зеркало”), Мәскеуде Н.Л. Тарасов пен Н.Ф. Балиев “Жарқанат” (“Летучая мышь”) деген атпен Миниатюралық Театр ашты. Ресей театр өнерінде шағын қойылымдар көрсету ісі кейіннен Ленинградта А.И. Райкиннің эстрада және миниатюра театрында, Мәскеуде Вл. Поляковтың эстрада театрында жалғасты. А.М. Арго, В.Е. Ардов, В.А. Дыховичный, т.б. қаламгерлер Миниатюралық Театр репертуарына арнап шығармалар жазды. Театрдың өркендеуіне өзіндік қолтаңба қалдырып, үлес қосқандар – Л.Б. Миров, Райкин, М.В. Миронова, Ю.Тимошенко мен Е.Березин (Тарапунька мен Штепсель), т.б. Тимошенко мен Березин Қазақстанда өнер көрсетті (1966 жылы, 1974 жылы).