Михаил Максимович Катаев

Михаил Максимович Катаев (5.12.1903, Павлодар облысы,Тереңкөл ауданы,Осьмерыск селосы - 26.1.1944, Беларусь, Гомель облысы,Мозырь қаласы) - 2-дүниежүзілік соғысқа қатысушы, нысанашы, гвардия старшинасы.1925-27 жылы КСРО-ның Оңтүстік шекарасындағы атты әскер бөлімінде әскери борышын өтеген. 1927 жылы туған жерінде ауылдық кеңестің төрағалығына сайланды. Соғысқа дейін Павлодар қаласы денсаулық сақтау бөлімінде бухгалтер болып істеді. 1941 жылдан майданда болып, Орталық майдан 61- армия 7-жеке гвардиялық танкіге қарсы жойғыш (истребительдік) атты әскер дивизиясы құрамында Ұлы Отан соғысына қатысты. Катаев Гомель ауданын азат етуде айрықша ерлік көрсетті. 1943 жылдың қыркүйектің 26-сынан 27-ciнe қараған түні алғашқылардың бірі болып, танкіге қарсы қолданылатын зеңбіректің 1 расчетімен Днепрдің батыс Жағалауына өтіп, жаумен қоян-қолтық айқасқа түсті. Жеке өзі жаудың 8 әскерін жойды. Осы ұрыста көрсеткен ерлігі мен батылдығы үшін оған КСРО Жоғарғы Кеңесі Төралқасының Жарлығымен Кеңес Одағының батыры атағы берілді (15.1. 1944).

1944 жылдың каңтарында Беларусь жерін азат ету ұрыстарында батыр ерлікпен қаза тапты. Мозырь (Беларусь), Павлодар қалалары көшелерінің бірі, Павлодардағы Оқушылар сарайы Катаевтың есімімен аталады. Мозырь қаласында оған ескерткіш орнатылып, Павлодарда жұмыс істеген үйге мемориалдық тақта орнатылған. Ленин, «Қызыл Жұлдыз» ордендерімен, медальдармен марапатталған.