Михаил Семенович Прохоров

Михаил Семенович Прохоров(8.11.1915, Ақтөбе облысы, Қобда ауданы, Қобда ауылы-11.5.1987, Ақтөбе қаласы) - 2-дүниежүзілік соғысқа қатысушы, аға сержант. Орта мектепті бітірген соң Астрахан қаласында (Ресей) есепші, бухгалтер болып жұмыс істеген. 1940 жылы Кеңес әскері қатарына алынып, соғыстың алғашқы күнінен майданда болды. 152-гвардиялық танкіге қарсы ататын артиллериялық атқыштар полкінің зеңбірек командирі Прохоров 1944 жылы 16-24 қазанда Тепи және Надькалло елді мекендері (Венгрия, Дебрецен қаласының маңы) үшін болған шайқаста көптеген жау әскерін, танкі мен қару- жарақтарын жойды. Осы ерлігі үшін КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (28.4.1945). Соғыс аяқталғаннан кейін Прохоров әскер қатарынан босап, Ақтөбе қаласында тұрды. Ленин, 1- және 2-дәрежелі Отан соғысы, «Қызыл Жұлдыз» ордендерімен, медальдармен марапатталған.