Николай Иванович Белавин

Белавин Николай Иванович (29.1.1923, Алматы қаласы-15.1.1980, Мәскеу қаласы)-2 дүниежүзілік соғысқа қатысушы, гвардия капитаны, ұшкыш-шабуылдаушы, эскадрилья командирі, кейін генерал-майор 1942 жылы Ворошиловград әскери ұшқыштар мектебін бітірген. Батыс,Солтүстік-Батыс, 2-Балтық бойы және 1-Беларусь майдандарында шайқасты. 1944 жылдың шілдесінде 33-гвардиялық шабуылдаушы әуе полкі командирінің орынбасары, капитан. Белавин 97 рет жауынгерлік тапсырмамен ұшып шығып, жаудың шоғырланған әскери ошақтары мен бекіністерін бомбалады. Ерліктері үшін Белавинге КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (26.10.1944). Ол 1945 жылдың сәуір айына дейін 159 жауынгерлік әуе тапсырмасын орындады. 1945 жылы 16 сәуірде оған Зеель биіктігіне шабуыл жасап жатқан 8-гвардиялық армия әскерлеріне Бранденбург қақпасының кілтін тастауға тапсырма берілді. Бұл тапсырманы Белавин ойдағыдай орындады. Соғыстан кейін ол Әскери-әуе күштерінде қызметін жалғастырды. 1951 жылы Әскери-әуе академиясын бітірді. 1979 жылы Белавин запасқа шықты. Ол екі рет Ленин, төрт рет Қызыл Ту, Александр Невский, 1-дәрежелі Отан соғысы, екі рет «Қызыл Жұлдыз» ордендерімен және медальдармен марапатталды.