Обаған - Есіл артезиан алабы

Обаған-есіл артезиан алабы (Убаган-Есильский артезианский бассейн) — Қостанай, Солтүстік Қазақстан облыстары жеріндегі артезиан алабы. Қалыңдығы 30-70 м-лік эоценнің құмдарында, құмтастарында, кремнеземге бай, қатты, жеңіл таужынысындағы (опока) су қабаты 60—100 м тереңдікте жатыр. Тұщы, сол ащы сулы қабат жіңішке танап (5—8 км) Есіл (палеозой жыныстарында) және Обаған (жоғарғы бор құмдарында) өзендерін бойлай орналасқан. Жарықшақты сулардың минералдылығы алаптың оңтүстігінде 3—9 г/л-ге, өзге аумақтағы барлық сулы горизонттарда 10—15 г/л-ге жетеді, кейде бұдан біршама жоғары болады. Деңгейі 48 м-ге дейін төмендегендегі көптеген ұңғымалардың су шығымы тәулігіне 10—45 м³. Есілге таяу орналасқан және палеозой жыныстарына жеткізіле бұрғыланған ұңғымалар тәулігіне 60—105 м³ су береді. Обаған өзені аңғарындағы ұңғымалардың су шығымы 170—215 м³. Артезиан суы шаруашылыққа кеңінен пайдаланылады.