Петр Иванович Кеппен

Петр Иванович Кеппен (1793–1864) – Қазақстанды зерттеуші орыс ғалымы, Санкт-Петербург ғылым академиясының академигі (1843). Харьков университетін бітірген (1914). 1827 жылға дейін халық ағарту әкімш-нде қызмет істеді, кейін Ресей империясының Ішкі істер министрлігіне қызметке ауысты. 1837 жылдан оның ғылыми қызметі Санкт-Петербург ҒА-мен тығыз байланысты болды.

Еңбектері

П.П.Семенов Тян-Шанскийдің редакциясымен жарық көрген «Ресей империясының географиялық-статистикалық сөздігін» (СПб., 1863–1883, 1–5-т.) даярлауға қатысты. Кеппен – қазақ халқы туралы, олардың бөлінуі, мекенжайы, саны туралы мәліметтер қамтылған «Тоғызыншы ревизия» аталатын ірі монографияның авторы. Құнды, хронологиялық «Еуропалық Ресей бұратаналарының тарихына арналған материалдар көрсеткішін» құрастырды. Онда қазақ халқының 1567–1809 жылдары тарихына қатысты маңызды оқиғалар баяндалады. Кеппен «Библиографиялық беттер» (1825–26) атты Ресейдегі алғашқы библиографиялық журналды шығарды, археология, филология саласына қатысты еңбектер жазды.