Республикалық мемлекеттік академиялық корей музыкалық комедия театры

Республикалық мемлекеттік академиялық корей музыкалық комедия театрыҚазақстандағы әлемдегі алғашқы этникалық және Корей түбегінен тыс жалғыз мемлекеттік корей театры.

Республикалық мемлекеттік академиялық корей музыкалық комедия театры
сурет
Орналасуы  Қазақстан
Негізделгені 1932
Директоры Любовь Ни
Бас балетмейстері Лариса Ким
Марапаттары 1982 жыл - "Құрмет белгісі" ордені; 2014 жыл - Корея Республикасының ассоциациясы атынан арнайы медаль мен алғыс хат; 2017 жыл - "Академиялық" мәртебе.

Тарихы

  • 1932 жылы Ресейдің Владивосток қаласында көркемөнерпаздар үйірмесі негізінде "Корей өлкелік театры" деген атпен ұйымдасты.
  • 1937 жылы депортация негізінде Қазақ Кеңестік Социалистік Республикасының Қызылорда қаласына көшірілді. Қызылорда қаласында қарапайым жұмысшылар мен оқушылардың алдында өнер көрсететін жылжымалы театр құрылды. Алғашқы жылдары театр корей ұжымшар жұмысшыларының өмірін сипаттайтын Тхай Дян Чунның "Бақытты адамдар", Александр Корнейчуктың "Эскадра қазасы" және Максим Горькийдің "Дұшпандар" атты қойылымдарын сахналады.
  • 1940 жылы театр Қызылорда облысының үшінші санаттағы "корей музыкалық драма театры" болып қайта құрылды.
  • 1941 жылы сол кезеңдегі тарихи оқиғаларға сәйкес, театр репертуары Ұлы Отан соғысына арналған өлеңдер оқылып, әндер айтылатын концерттік бағдарламалармен толықты. Театр әртістері эвакуацияланған халық пен жарақат алғандардың алдында өнер көрсетті.
  • 1942 жылдың 13 қаңтарында театр Қызылордадан Талдықорған облысы Қаратал ауданы Үштөбе станциясына көшірілді. Осыдан кейін атауы "Талдықорған облыстық корей музыкалық-драма театры" болып өзгертілді.
  • 1942-1945 жылдары аралығында театр Таяу Шығыста кеңес үкіметін орнату үшін күрес жүргізген корейлердің өмірі туралы Тхай Дян Чунның "Хан Бом. До", Константин Финнің "Петр Крымов", Валентина Катаеваның "Көк орамал", Константин Симоновтың "Күндер мен түндер" шығармаларын сахналады.
  • 1950 жылы Ташкент пен Талдықорған облыстарындағы корей музыкалық-драма театры бірікті. Жаңа театр Үштөбе станциясында құрылды. Театр шығармашылығында Тхай Дян Чунның "38 параллельден оңтүстікке қарай" және Ен Сен Неннің "Корея жалынның құрсауында" сынды қойылымдары көрсетілді.
  • 1955 жылы корей театры Алматы қаласына гастрольдік сапармен барды.
  • 1959 жылы театр қайтадан Қызылорда қаласына көшірілді. Бұдан кейін театр 1968 жылы Алматы қаласына көшіріліп, мәртебесін өзгертіп, "Мемлекеттік Корей музыкалық комедия театры" деп аталды.

Әр жылдардағы қойылымдары

Театр сахнасында ұлттық классика бойынша Ли Ден Ним мен Ен Сен Неннің "Чун Хян деген қыз туралы аңыз" (1935-36), Тен Дон Хектің "Ондал туралы аңызы" (1972) мен Хан Диннің "Янбай туралы аңыз" (1973, 1985), сонымен қатар Н.Островскийдің "Найзағайы" (1950), Ғ.Мүсіреповтің "Қозы Көрпеш-Баян сұлу" (1949, 1975), М.Әуезовтің "Еңлік—Кебек" (1962), т.б. пьесалары да орын алды. Мұнда "Ариран" эстрада ансамблі мен ұлттық бишілер тобы бар. Ұлттық классика бойынша қойылған спектакльдерде корей халқы ән-би жанрының элементтері мол кездеседі. [1]

Театр жетістіктері

Актерлер Ли Дян Сон, Ким Дин, Ли Гир Су, Ли Хэм Дек, Пак Чун Себ, Чой Бон До, В.Е. Ким, Р.И. Ким, режиссерлер мен театр әртістері Ён Сен Нен, Мен Донг Вук, Те Дэн Гу, А.А. Пашков, И.Ким, О.С. Ли және басқалар. «Ариран» және «Самулнори» ансамбльдері ТМД елдеріндегі жалғыз кәсіби корей командасының құрамына кіреді. Олардың жарқын биі мен вокалды-аспаптық өнері Қазақстанның көптеген қалаларында, Орта Азияда, Ресей Федерациясында және Корея Республикасында сәтті ұсынылған. Театр сахнасында 250-ден астам қойылымдар мен концерттік бағдарламалар қойылды. Театр репертуарында ұлттық және қазіргі заманғы корей спектакльдері, сонымен қатар қазақстандық және шетелдік драматургтердің қойылымдары бар.

Театр өнерінің дамуына қосқан үлесі үшін корей театры "Құрмет белгісі" орденіне ие болды. Тетардың бес әртісіне халық әртісі атағы, тоғызына – еңбегі сіңген әртіс атағы, бір әртіске еңбегі сіңген қайраткер, он жеті әртіске Қазақстан Республикасының еңбегі сіңген әртіс атағы, екі әртіске – II дәрежелі «Достық» орденінің кавалері атағы, тағы да бір әртіске «Құрмет» ордені және басқада мемлекеттік сыйлықтар берілді. Театрдың 80 жылдығына (2012 жыл) орай корей драматургы И Гын Самның пьесасы «Көшпелі труппа» бойынша спектакль қоюға Корея Республикасынан әйгілі режиссері Ким Сок Ман шақырылды. Сонымен қатар 2012 жылдың 26–30 қыркүйек аралығында өтекен Корей театры апталығында Сеул қаласының драма театры әртістерінің қойылымын қазақстандық көрермендер тамашалады. Бүгінде корей театры Қазақстан корейлерінің ең басты мәдени ошақтарының бірі болып саналады.[2]

Галерея

Дереккөздер

  1. Жетісу энциклопедия. - Алматы: «Арыс» баспасы, 2004 жыл. — 712 бет + 48 бет түрлі түсті суретті жапсырма. ISBN 9965-17-134-3
  2. Қазақстанның мәдени ошақтары. Культурные центры Казахстана: Фотоальбом. – Алматы:«АСА» Баспа үйі» ЖШС, 2012. – 288 б. (қазақ, орыс, тілдерінде) ISBN 978-601-80325-0-9