Александр Дмитриевич Романов

Александр Дмитриевич Романов (1922, Жаңақорған ауданы Төменарық ауылы – 27.4.1945, Берлин қ.) – соғыс ардагері, Кеңес Одағының Батыры (27.6.1945). Соғыстың алғашқы күндерінде Романов әскери училищені бітіріп, майданға аттанды. 1942 жылы маусым айында ұрысқа кіріп, Еділден Эльбаға дейінгі жауынгерлік жолдан өтеді. 1-Украина майданындағы 3-гвардиялық танк армиясына қарасты 70-механикаландырылған Проскуров бригадасының 1-мотоатқыштар батольонында рота командирі лейтенант Романовтың жауынгерлері 1945 жылы көктемде Берлиннің іргесіндегі Нейсе өзені жағасындағы шайқастардың бірінде 104 жаудың көзін жойып, 118 адамын тұтқынға алды. Жеке өзі 19 дұшпанды құртып, рота 15 автомашина мен 45 автомат, 9 станокты пулеметті қолға түсірді. 23 сәуірде Романовтың ротасы күші басым жаудың алты бірдей қарсы шабуылын тойтарып, қарша бораған оққа қарамастан, Тельтов каналын кешіп өтіп, плацдармды иеленді. 27 сәуір күні қала көшесіндегі қиямет-қайым ұрыста ерлікпен қаза тапты. Романов оқыған «Төменарық» аулындағы 53-орта мектебі батыр есімімен аталады. Мектеп мұражайында арнайы бөлме ұйымдастырылған.

Сілтемелер

Қазақ энциклопедиясы