Сартбаев Қалқабай Қалықұлы

Сартбаев Қалқабай Қалықұлы (31.5.1911, Жамбыл облысы, Жамбыл ауданы Сымтас мекені — 28.10.1988, Бішкек қ.) — түркітанушы, филол. ғыл. докт. (1953), проф., Қырғыз КСР-і ғылым академиясының корр. мүшесі (1954). Қырғыз мемл. пед. ин-тын (1939), Мәскеу ҒА Тіл білімі ин-тының докторантурасын (1953) бітірген. Еңбек жолын Байзақ ауданында мұғалімдіктен бастады (1929). Сартбаев Қырғыз мемл. ун-тінде ассистенттен ғыл. істер жөніндегі проректорға дейін түрлі қызметтер атқарған. 200-ден астам ғыл.-зерт. мақалалары, бірнеше монографиясы жарық көрген. Сартбаев — “Қырғыз тілін оқытудың методикасы” (1951), “Қазіргі қырғыз тіліндегі құрмалас сөйлемдер синтаксисі” (1957), “Түркі тілдерінің салыстырмалы грамматикасы” (1962), т.б. еңбектер, мектеп оқулықтарын жазған. Жамбыл облысы Жамбыл ауданындағы орта мектепке (1993), Бішкек қ-ндағы көшеге Сартбаев есімі берілген.