Солтүстік Қарамандыбас мұнай кен орны

Солтүстік Қарамандыбас мұнай кен орны — Оңтүстік Маңғыстау ойысымының Жетібай-Өзен антиклин өңіріндегі мұнай кен орны. Жаңаөзен қаласының солтүстік-батысында 39 км жерде. Кен орны 1988 жылы ашылған.

Геологиялық құрылымы

Кен орны Солтүстік Қарамандыбас брахиантиклинінен орын алған. 1840 және 1880 м тереңдіктерде ортаңғы юраның құмтастардан құралған осы жікқабатының екі горизонтының өнімділігі анықталған.

Жатыс сипаты

Жинауыштары кеуекті, ашық кеуектілігі 20-22% өтімділігі 0,07-0,116 мкм². Қалыңдығы 14-30 м-ге дейін жететін саз будасы жапқыш қызметін атқарады. Бірінші горизонттың жалпы қалыңдығы 14 м, екіншісінікі 15,2 м, тиімді және мұнайға қаныққан қалыңдық, тиісінше, 9 және 12,8 м. Жатындар қойнауқаттық күмбездік. Су-мұнай жапсарының абсолют белгілері -1636 м, -1678 м. Жатындардың биіктігі 14 және 15,2 м. Бастапқы қойнауқаттық қысым 17,86 және 18-23 Мпа, температура 77 және 90°С. 1138 м-лік динамикалық деңгейдегі бірінші горизонттың мұнай шығымы 29 м³/тәу, екіншісінікі 6 м³/тәу.

Құрамы

Мұнайдың тығыздығы тереңдеген сайын 852 кг/м³-ден 859 кг/м³-ге дейін өседі. Мұнайда 18% парафин, 14,9% шайырлар мен асфальтендер бар. Қойнауқаттық мұнайдың газға қанығу дәрежесі екі горизонт үшін де 45 м³/т. Хлоркальцийлі типті қою тұздық түріндегі қойнауқаттық сулардың тығыздығы 1078 кг/м³, минералдылығы 154 г/л., 9 мг/л бор микроэлементі бар. Жатынның режимі суарынды. Кен орны сынама игеру сатысында.