Тізбектегі сымдардың орындарын ауыстыру

Тізбектегі сымдардың орындарын ауыстыру (орыс. Скрещивание цепей) — әуе байланыс тізбектерінің арасындағы өзара әсерді азайту үшін тізбек сымдарының орындарын белгілі бір қашықтықта ауыстыру. Тізбектегі сымдардың орындары ауыстырылмаған байланыс жолдарының бөліктеріндегі әсерден пайда болатын токтар қосылып, қорытынды ток белгіленген мөлшерден артық болып кетуі мүмкін. Қатар салынған екі тізбектің біреуінің сымдарының орындарын ауыстырса, онда соған дейінгі және одан кейінгі екі көрші бегеуіл токтардың таңбалары қарама-қарсы таңбаға ауысып, бірінбірі азайтады. Егер осы көрші бөлік ұзындықтары бірдей болса, онда бегеуіл әсер токтары бірін-бірі толық жоюы мүмкін. Бегеуіл токтар таңбаларының өзгеретін байланыс жолының ұзындығын сымдардың орын ауыстыру бөлігі немесе орын ауыстыру қадамы деп атайды. Сөйтіп, байланыс жолының барлық ұзындығын жұп санды бірдей бөліктерге бөліп, сол жерлерде қатар салынған екі тізбектің біреуінің сымдарының орындарын ауыстырып отырса, көршілес бөліктердегі бөгеуіл токтар біріне-бірі қарсы бағытталып, олар бірін-бірі жояды. Егер қатар жатқан екі тізбектің екеуінің де сымдарын бір жерде ауыстырса, онда ол ауыстыру орнында токтар 360°-қа айналып, сымдардың орын ауыстыру әсері жойылып, токтар бірін-бірі жоймай, қайта қосылып көбейеді. Сөйтіп, тізбектердің сымдары орындарын ауыстырмағандай болады. Сондықтан бір тізбектегі сымдардың орындарын ауыстырса, ол жердегі екінші тізбек сымдарының орындарын ауыстырмау керек.