Түйме қадау машинасы

Түйме қадау машинасы – арнайы киімдерге, аяқ киімге, т.б. бұйымдарға түйме қадауға арналған тігін машинасы.

Түйме қадауда жартылай автоматты машиналар қолданылады. Жартылай автоматты машиналар екі басқышпен (педальмен) жабдықталған. Түйме қадау машинасы жұмыс органдарының қозғалысы бойынша екі топқа бөлінеді: ине тек тік, ал мата платформа бойынша көлденең және бойлай қозғалыс жасайтын машиналар; ине тік қозғалыстан басқа платформа бойынша көлденең ауытқып, ал мата платформада тек көлденең бойлай қозғалыс жасайтын машиналар. 4 және 2 тесікті жазық түймелерді қадайтын жартылай автоматты түйме қадау машинасы көбірек қолданылады. Түйме қадау машинасының негізгі жұмыстық бөлігі ине, қайық, жіптартқыш және түйме ұстағыштан тұрады. Түйме қадау оны түйме ұстағышқа салудан басталады. Түйме ұстағыштың астына мата салып, басқышты басу арқылы машина іске қосылады. Түйме ұстағыш түймені ұстап, оны матаға қысады. 4 тесікті түймені қадау үшін 21 шаншу жасалады, алдыңғы тесіктер жұбына 1-ден 10-ға дейін иненің шаншуы орындалады. Ине түйме тесігінің аралығына сай көлденең ауытқу жасайды. 10-шаншудан кейін ине оңға қарай ауытқиды, ал мата түймемен бірге жұмысшыға қарай тесіктердің екі жұбының аралығына сай жылжиды. Ине 3-тесікке кіріп, қайтадан көлденең ауытқуын 11-шаншудан жасайды. Түймені қадағаннан кейін машина тоқтайды және түйме ұстағыш көтерілген кезде жіп автоматты түрде кесіледі. Егер түйме екі тесікті болса, онда 1 және 14-шаншуға дейін түйме ұстағыш жылжымайды, ал түйме иненің көлденең ауытқуы арқылы қадалады. Жіпті және қайықты сабақтау әдеттегідей орындалады.