Тәжмұхамбет Темірұлы Жалпақов

Тәжмұхамбет Темірұлы Жалпақов (1897 жыл Орал облысы Ілбішін уезі, Мәтеш болысының 8-ауылы - қайтыс болған уақыты белгісіз) - Батыс Алашорда офицері.

Өмірбаяны

Әкесі орта шаруалы адам болған.

• Т.Жалпақов 1917 жылы болыстық орыс-қазақ мектебін бітірген соң, қалалық Романов орыс-қазақ мектебінен оқиды.
• Содан соң Воронеж ер балалар фельдшерлік мектебін бітіреді.
• 1918 жылы жазда Ғ.Мұхитов, Т.Бекмағанбетовпен бірге Ойылдағы тұңғыш қазақ кавалериялық юнкерлер мектебіне түседі.
• 1919 жылы юнкерлік мектепті тәмамдап, прапорщик шенін алып шығады.
• Онан соң Жымпиты ауданындағы Алаш полкінің шаруашылық бөлімінде қызмет атқарады. Кәсіби біліктілігімен тума талантының арқасында полктің штаб офицері болып тағайындалады.
• 1919 жылдың аяқ шенінде полкпен бірге Ойыл бекінісіне келеді. Батыс Алашорда таратылған кезде Батыс Алашорданың бірнеше офицерлерімен бірге Орынбор қаласына айдалады. Алашордаға қызмет еткен Т.Жалпақов кеңес жұмыстарына да тартылады. Өйткені ол түста Т.Жалпақов сияқты тәжірибелі білікті, іскер маман табыла бермейтін. Ал Т.Жалпақов үшін де бұл тиімді болады. Алашорда таратылған, ендігі елге септігі тиетін жалғыз жолы - үкімет жұмысын істеу еді.
• 1920 жылдың сәуір, желтоқсан айлары аралығында Қазақ өлкелік Төтенше комиссияның ерекше тапсырмалар жөніндегі комиссары болып жұмыс істеді.
• 1920-1921 жылдары Жымпиты уездік еңбек комитетінің жұмылдыру болімінің бастығы, Қызыл армия құрамындағы ерікті коммунистік эскадрон командирінің көмекшісі, Жымпиты уездік еріктілер отрядының командирі болып істейді.
• 1922-1924 жылдары Тайпақ болыстық атқару комитетінің төрағасы болады.
• 1924-1928 жылдары Орал облыстык тұтынушылар одағы қоғамының нұсқаушысы болып кызмет атқарады. Осыдан кейін Т.Жалпақов еңбек демалысына шыққанша есеп саласында жергілікті тұтынушылар одағында, кеңшарда, кооперативтерде бухгалтерлік қызметтер істеген.
• 1942-1945 жылдар аралығында екінші дүние жүзілік соғысқа қатынасады.
• Соғыстан кейін 1945-1952 жылдары Теректі аудандық тұтынушылар одағының бас бухгалтері
• 1952-1956 жылдары Қаратөбе ауданындағы Аққозы жұмысшылар кооперативінің бас бухгалтері болып істеген.
• 1956 жылы зейнеткерлік демалысына шығып, өмірінің соңына дейін Аққозы кеңшарында тұрады.