Арқабек Төлебаев

Арқабек Төлебаев (1953 жылы туған, Талас ауданы, Бостандық ауылы) – кәсіпкер.

Шыққан тегі Ұлы жүздің Дулат тайпасы Шымыр руынан.

Қаратау тау-кен құрылыс техникумын бітірген. Еңбек жолын Орал қаласындағы гидрогеологиялық экспедицияда техник болып бастайды. 1974 ж. Жамбыл облыстық ауыл шаруашылық басқармасында бухгалтер. 1977 – 89 ж. Жамбыл қаласының кәсіпорындарында жабдықтау, қамтамасыз ету мекемелерінде басшы қызметтерде болады. 1989 ж. «Шаруашылық ағаш саудасы» құрылыс мекемесінің директоры. Алғашқылардың бірі болып жұмыс істеудің жалдық-подрядтық түріне көшіп, 1992 ж. «Сауда» ұжымдық фирмасын, 1993 ж. «Төлебаев және К» фирмасын құрып, 1998 ж. оның құрамына «Әулиеата» қ-лық базар енді. Төлебаев тіршіліктің сан түрлі салаларында белсенділік танытып, өскелең жас ұрпаққа, ата-баба рухына қамқоршылық көрсетуде үлгілі істерімен көзге түсіп келеді. Туған ауылы Бостандықта «Тұңғатар» мешітінің құрылысын аяқтады. «Бәйдібек баба» мен «Домалақ ана» кесенесінің қорына, «Әулиеата» мешітіне, «Наурыз – 99, «Наурыз – 2000» мерекелерінің сыйлық қорына, екі еңбек ардагеріне бір-бірден жеңіл көлік сыйлап, 2-дүниежүз. соғыс ардагерлеріне қаржылай көмек көрсетуді жүзеге асырып отырады. Салауаттық өмір салтына, дене тәрбиесі мен спортты дамытуға көңіл бөліп келеді, «Тараз» футбол командасының тұрақты демеушісі, облыстық грек-рим күресі ассоциациясының президенті. Облыстық мәслихаттың депутаты.