Фарерліктер

	Føroyingar
Бүкіл халықтың саны
	80 000 - 90 000
Ең көп таралған аймақтар
Фарер аралдары	48 500
Дания	21 687
Норвегия	500 - 1000
Исландия	500
Тілдері
	фарер тілі
Этникалық топтары
	исландықтар

Фарерліктер (фарер тілі: føroyingar, дат. færinger) — Фарер аралдарының халқы. Жалпы саны 45 мың адам (2003). Антропологиялық жағынан атлант-балтық нәсіліне жатады. Фарерліктер даттармен бірге скандинавиялықтар арасындағы бойы қысқа халық. Батыс норвег диалектісі мен исланд тілі аралығындағы фарер тілінде сөйлейді. Діні — лютеран. Фарерліктер — нормандардың ұрпақтары. Олар 9 ғасырдан бастап аралдарды қоныстанып, мұнда кельт тайпаларымен араласып кеткен. Атауы аралдарға қатысты қалыптасқан. 1814 жылдан Дания құрамында. 1948 жылы дербес басқарылатын округ мәртебесін иеленген. Негізгі ш. — қой өсіру. Қазіргі таңда балық аулау кәсібі дамыған. Құс аулау кәсібі бұл күнде спорт түріне айналған. Көпшілігі хуторларда, шағын қалаларда тұрады. Дәстүрлі тағамдары — ірімшік, қой мен балық еттеріне негізделген. Ұлттық киімдері қой жүні мен терісінен жасалған. Ерлер тоқылған свитер немесе кофта, жағасы тік, екі қатар түйме орнатылған қара не көк камзол, қызыл желет, тізеден сәл төмен қысқа шалбар, ою-өрнек салынған шұлық, басына қалпақ, аяғына тері башмақ киеді. Әйелдер кеудесі жіппен жабылатын тоқылған кофта, өрнекті ұзын юбка, алжапқыш, иығына жүн орамал, аяғына табаны жұқа тері башмақ киіп жүрген. Фольклорында ортағасырлық мәтіндер басым.

Сілтемелер

"Қазақ Энциклопедиясы", 9 том