Хиндилер

Хиндилер, хиндустандықтар — Үндістанның солтүстігіндегі Хиндустан тарихи облысын мекендейтін этникалық қауымдастық. Үндіеуропа тілдер шоғырындағы хинди тілінде сөйлейді. Жалпы саны 218 млн. адам (2004). Антропологиялық жағынан үлкен еуропоидтық нәсілдің үндіжерортатеңіздік тобына жатады. Хиндилер мәдениеті мен тұрмысы бір-біріне өте жақын бірнеше жергілікті топтардан тұрады. Діни наным-сенімдері жағынан көпшілігі — индуистер, ислам діні де кең тараған. Рухани және заттай мәдениеті үнділерге өте ұқсас. Этникалық тарихы қола дәуірінен бастау алады. Хиндилер негізінен егіншілікпен айналысады. Бидай, тары тұқымдас өсімдіктер (бажра, жовар), бұршақты тұқымдастарды, сұлы егеді. Оңтүстік аймақтарда күріш, майлы өсімдіктер, қант қамысын, мақтаны көбірек өсіреді. Біраз хиндилер өндірістік кәсіпорындарда жұмыс істейді. Тоқымашылық ежелден өркендеген; муслина матасынан бұйымдар (сари, дхоти) жасалынады, түрлі кілемдер (дари) тоқылады, көркем жібек маталар даярланады. Металл ыдыстар мен құмырашылық дамыған. Ауылдық жерлердегі дәстүрлі баспаналары — шатыры сабанмен немесе жапырақтармен жабылған, сырты сазбалшықпен сыланған үйлер. Қалалы жерлерде таспен өрілген баспаналар пайдаланылады. Ұлттық киімдері үнділерге ұқсас болып келеді. Ерлер — беліне дхоти немесе ақ матадан тігілген тар шалбар, көйлек пен алды жабылатын ұзын кафтан; әйелдер — сари мен кофта киеді. Ауылдық жерлерде кастаға бөліну сақталған.