Экономикалық аудан, интегралдық экономикалық аудан

Экономикалық аудан, интегралдық экономикалық аудан - табиғат пен экономика жағдайларының өзіндік ерекшеліктерімен, географиялық еңбек бөлінісі негізінде тарихи қалыптасқан немесе шаруашылыктың арнайы мамандандырылуымен, аудан ішінде тұрақты және қарқынды шаруашылық байланыстарының болуымен сипатталатын елдің (аймақтың) шаруашылығының аумақтық және экономикалық бөлігі; қоғамдық өндірістің аумақтық ұйымдастырылуындағы негізгі буын, аймақтық саясат пен аумақтық жоспарлаудың басты нысаны. Экономикалық ауданның мамандануы - жалпы ұлттық немесе сыртқы рынокқа тауар өндіру мен қызмет көрсетуді дамыту (шоғырландыру); жергілікті табиғат ресурстарын, экономикалық-географиялық орынның қолайлылығын, қалыптаскан өңдірістік аппаратты және халықтың еңбек дағдыларын пайдаланудың нәтижесінде қоғамдық еңбекті үнемдеуге жол ашады. Экономикалық ауданның маңызды көрсеткіші — ауданның тұтас аумақтық-шаруашылық түзілім ретіндегі даму деңгейі; ол ауданның ресурстары, өндірісі және ішкі қажеттілігінің арасындағы үйлесімділіктің дәрежесімен, шаруашылықтың барлық салаларының өзара байланыстылығымен аныкталады.