Ғылымның кең өрісі (мақала)

Ғылымның кең өрісі – Қаныш Сәтбаевтың мақаласы. Алғаш рет «Социалистік Қазақстан» (қазіргі «Егемен Қазақстан») газетінің 1961 жылдың 27 желтоқсанындағы санында басылған. Сәтбаевтың 2007 жылы «Оңтүстік полиграфия» баспа үйінен шыққан шығармалар жинағының 1-томына енген. Мақала 5 бөлімнен тұрады. Онық бірінші, екінші бөлімінде атом қуатын бейбіт мақсаттарға пайдалану ісі жөнінде және Ғылым академиясы жанындағы ғылыми мекемелердің зерттеу жұмыстарын өрістете алатын сәнді сарайлары, тәжірибе алаңдары, жабдықты үйлерге орналасқан зертханалар ашылғаны, республикада Ғылым Академиясының тамаша ғимараты, патология-зоология институттарының, бірнеше тәжірибелік базалардың үйлері 1946 жылдан бергі уақыт ішінде салынып пайдалануға берілгені, геология, ядролық физика, химия ғылымдары институттарының, ионосфера станцияларының жаңа үйлері салынып, іргетасы қаланып, шаңырақ көтергені туралы жазылған.

Қалған бөлімдерінде Қазақ КСР Ғылым Академиясының 15 жыл ішінде атқарған жұмыстары мен академия ғалымдарының бірнеше еңбектері Лениндік сыйлыққа ие болғандығы әрі таяу жылдар ішінде ҚазМУ (Қазіргі ҚазҰУ) жанынан қатты дене физикасы, астрофизика, ионосфера физикасы, ядролық физика кафедраларын, сол сияқты Қазақ политех, (қазіргі Қаныш Сәтбаев атындағы ҚазҰТУ) институтында жаңадан машина құрылысы және өндірісті автоматтандыру факультеттерін ашу орынды екені, жиырма жыл ішінде Қазақ КСР Ғылым Академиясында бірнеше жаңа институттар ашылғаны, ал бұрынғыларының барынша дами түскені жайлы айтылған.