Қазанат

Қазанат – батырлардың жауынгерлік аты. 19 ғасырдың жазба деректерінде бұл жылқылардың арғымақтар мен далалық қазақы жылқыларды (жабы) будандастыру арқылы алынғаны айтылған. Қазанат дене бітімі жабыдан ірі, шоқтығы биік, омыраулы, кең кеуделі, күпшек санды, құйма тұяқты, басы онша үлкен емес, кең танаулы болып келеді. Денесі келісті, мүсінді де, шымыр. Мініске берік, шабысқа жүйрік. Қазанатты “ер аты”, “жауынгерлік ат” деп атаған. Түркілердің жергілікті жылқыларды араб сәйгүліктерімен будандастырып, асыл тұқымды жылқы алғандығы Тан әулеті тұсындағы Қытай деректерінде айтылады. Батырлардың атын өсіру құлын кезінен бастап, 6 – 7 жасына дейін созылған.