Қазақстан — Тайланд қатынастары

Қазақстан — Тайланд қатынастары — Қазақстан Республикасының Тайланд корольдігімен ынтымақтастығы.

Дипломатия

Қазақстан Республикасы мен Таиланд Корольдігі арасындағы дипломатиялық қатынастар 1992 жылғы 6 шілдеде орнатылды.

Бангкок қаласындағы Қазақстан Дипломатиялық миссиясы 1997 жылы ашылды (2012 жылы Елшілік болып қайта құрылды). 2022 жылғы сәуірден бастап Қазақстанның Таиландтағы Елшісі А.Исетов болып табылады.

Таиланд Корольдігінің Қазақстандағы Елшілігі 2012 жылы ашылды.

Саяси ынтымақтастық

Жоғары деңгейдегі байланыстар

Қазақстан Президенті Н.Ә. Назарбаев 1993 жылы шілдеде Таиланд Корольдігіне ресми сапармен барды.

Жоғары деңгейдегі байланыстар

Таиланд ханшайымы Маха Чакри Сириндорн Қазақстанға ресми сапармен (2005 ж.17-20 сәуірде) және екі рет жеке сапармен (2015 ж. 6 сәуір және 2016 ж. 10 сәуір) келді.

2006 жылғы маусымда Таиланд Премьер-Министрі Т.Чинаваттың АӨСШК-нің 2-ші Саммитіне қатысу шеңберінде Қазақстанға ресми сапары өтті.

Таиланд Премьер-Министрінің орынбасарлары деңгейінде Қазақстанға С.Сатиратай (2005 ж. мамыр), Т.Патимапракорн және П.Джунтонг (2017 ж. тамыз, ЭКСПО-2017 көрмесінде Таиландтың мәдениет күні аясында) барды.

Министрлік деңгейдегі байланыстар

2004 ж. қазан айында ТК Сыртқы істер министрі С.Сатиратайдың Қазақстанға сапары өтті.

Қазақстан Сыртқы істер министрі Қ.К.Тоқаев 2005 жылғы мамырда БҰҰ ЭСКАТО-ның 61-ші сессиясына қатысу үшін Таиландқа жұмыс сапарымен барды.

Таиландтың Сыртқы істер министрі К.Пиромия 2010 жылғы шілдеде Қазақстанда өткен ЕҚЫҰ СІМК-не қатысты.

Қазақстан Сыртқы істер министрінің бірінші орынбасары М.Б.Тілеуберді Бангкоктағы ЭСКАТО-ның 74-ші (2018 ж. 11-16 мамыр) және 75-ші (2019 ж. 27-28 мамыр) сессияларына қатысты.

Премьер-Министрдің арнайы өкілі – ТК Сыртқы істер вице-министрі Виджават Исарабхакди АӨСШК-нің 6-шы саммитіне қатысу шеңберінде Астанаға барды (2022 жылғы 12-13 қазан).

Парламентаралық ынтымақтастық

2016 жылғы 2-4 қарашада және 2018 жылғы 3-5 мамырда (халық және даму жөніндегі парламентарийлердің Азия форумы атқару комитетінің 86-сессиясына қатысу) Қазақстан Парламенті Мәжілісі төрағасының орынбасары Г.И. Исимбаеваның Таиландқа сапарлары өтті.

2017 жылғы 20-23 наурызда А.Н.Жайылғанова мен Ш.А.Өтемісов құрамындағы Қазақстан парламенттік делегациясы Халық және даму жөніндегі парламентарийлердің Азия форумының өңірлік конференциясына қатысу үшін Таиландта болды.

2019 жылғы 13-15 ақпанда Қазақстан Парламенті Сенатының депутаты А.С. Құртаев Бангкокта өткен Азия Парламенттік Ассамблеясының әлеуметтік және мәдени істер жөніндегі тұрақты комитетінің отырысына қатысты.

2019 жылғы 24 қыркүйекте Ұлттық жиналыс Сенатының Төрағасы П. Вичитчолчай бастаған ТК парламенттік делегациясы Нұр-Сұлтандағы Еуразия елдері Парламенттері спикерлерінің IV кеңесіне қатысты.

Сауда-экономикалық ынтымақтастық

2022 жылы Қазақстан мен Таиланд арасындағы тауар айналымы 269,9 млн АҚШ долл. құрады, бұл өткен жылдың кезеңімен (144,1 млн. АҚШ) салыстырғанда 87,3%-ға жоғары.

2022 жылғы қаңтар-желтоқсанда Қазақстаннан Таиландқа Экспорт 3,1 млн. АҚШ доллар құрады.

Таиландтан Қазақстанға Импорт 2022 жылғы қаңтар-желтоқсанда 2,1 есеге өсіп, 266,8 млн. АҚШ доллар құрады.

Туризм

2016 жылғы 4-5 тамызда Таиландтың Туризм және спорт министрі К. Ваттанаврангкул Қазақстанға жұмыс сапарымен барды.

2017 жылғы 16 шілдеде Таиланд Туризм және спорт министрі К.Ваттанаврангкулдың Қазақстанға кезекті сапары өтті (ЭКСПО аясында).

2021 жылғы 31 қазанда «Air Astana» алғаш рет Алматы-Пхует әуе қатынасын ашты, ал 2022 ж. 29 қазаннан бастап Алматы – Бангкок рейсін қайта бастады. 2022 жылы Таиландқа 55 мыңға жуық қазақстандық турист келді.

Мәдени-гуманитарлық ынтымақтастық

Дүниежүзілік буддистер қауымдастығының Бас хатшысы П.Тхайарри және Чулалонгкорн университетінің Сыртқы істер жөніндегі вице-ректоры С.Чотико Қазақстанға барды (Әлемдік және дәстүрлі діндер көшбасшыларының V съезі, 9-11 маусым 2015 ж.).

2016 жылғы 31 мамыр – 1 маусым аралығында «Діндер терроризмге қарсы» халықаралық конференциясы мен Әлемдік және дәстүрлі діндер көшбасшылары Съезі Хатшылығының XV отырысына қатысу үшін Дүниежүзілік буддистер қауымдастығының Бас хатшысы П.Тхайарри Қазақстанға барды.

Дүниежүзілік бейбітшілік Елшісі Кеңсесінің бас хатшысы П.Товивич пен Дүниежүзілік буддистер университетінің ректоры Анил Ман Сакия Қазақстанға барды (Әлемдік және дәстүрлі діндер лидерлері Съезі Хатшылығының XVI отырысы, 18 мамыр 2017 ж.).

Дүниежүзілік буддистер қауымдастығы президентінің кеңесшісі Т.Сучарикул және Дүниежүзілік бейбітшілік Елшісі Кеңсесінің Бас хатшысы П.Товивич Әлемдік және дәстүрлі діндер көшбасшыларының VI Съезіне қатысты (қазан 2018 ж.). Т. Сучарикул сонымен қатар Әлемдік және дәстүрлі діндер көшбасшылары Съезі Хатшылығының XVIII, XIX отырыстарына қатысты (2019 ж.тамыз және 2021 ж. қазан).