Қазақ ССР Ғылым Академиясының хабарлары, биология топтамасы (журнал)

Қазақ КСР Ғылым Академиясының хабарлары, биология топтамасы - Алматы қаласындағы «Ғылым» баспасынан 1963 жылдан жылына 6 рет орыс тілінде биология ғылымдары бөлімі шығарған журнал; көлемі 9 баспа табақ. Әр түрлі шолу мақалалар және жалпы теориялық мақалалар, биология ғылымдары бөлімі мен оның мекемелерінің ғылыми ұйымдық қызметінің қорытындылары және зоология, ботаника, генетика, тағы басқалары жөніндегі теориялық материалдар, ғылым жетістіктерінің халық шаруашылығында қолданылуы жөніндегі жұмыстар жарияланып тұрды. Топтаманың 1969 жылы шыққан 2-санының алғашқы бетінде академик Қаныш Сәтбаевтың суреті беріліп, Қазақстан Ғылым Академиясының академик Ф.Мұхамедғалиевтың орыс тілінде «Қаныш Имантайұлы Сәтбаевтың туғанына 70 жыл» атты мақаласы жарияланған. Онда Сәтбаевтың басшылығымен биология ғылымының басты салалары құрылып, зерттеудің негізгі бағыттары анықталып, топырақтану, ботаника, зоология, физиология, тағы басқалары ғылыми-зерттеу институттары ұйымдастырылғаны жайында жазылған.

Сәтбаевтың бастамасымен еліміздің топырақ-географиялық жағдайлары, өсімдіктер байлығы, жануарлар дүниесі зерттеледі. Ауыл шаруашылық жерлерін игеру мақсатында республиканың барлық облыстарының картасы жасалды, көп томдық «Қазақстан флорасы» шығарылды, медицинаның дамуына, тың жерлерді игеруге ғалым Сәтбаевтың орасан ұйымдастырушылық қызметі де зор әсер етті делінген.