Қазақ мемлекеттік Әлем тілдері университетінің қазақ филология кафедрaсы

Қазақ мемлекеттік Әлем тілдері университетінің қазақ филология кафедрaсы "Қазақ және орыс тілдер кафедрасы" деген атпен 1956 жылы ашылған. Оған қазіргі ҚазМӘТУ-дің барлық факультеттерінде қазақ бөлімдерінің ашылуы негіз болды.

Ол 1969 жылы "Қазақ және жалпы тіл білімі" кафедрасы болып қайта құрылды. 1980 жылы бұдан "Жалпы тіл білімі" кафедрасы бөлініп шығып, соның нәтижесінде "Қазақ тілі" және "Орыс тілі" кафедралары дүниеге келді. 1988 жылы жоғары үш кафедра қайта бірігіп, "Қазақ және жалпы тіл білімі" кафедрасы деген бұрынғы атына ие болды. Институтта қазақ тілінен екінші мамандық даярлау қажеттілігіне байланысты 1990 жылы бұл кафедрадан "Практикалық қазақ тілі" кафедрасы бөлініп шықты да, негізгі кафедра "Қазақ және шығыс филологиясы" кафедрасы болып басқаша аталынды. 1996 жылы "Шығыс филологиясы" кафедрасының жеке бөлініп шығуына орай оның бұрынғы аты енді "Қазақ филологиясы" болып өзгерді. Қазіргі кезде бұл кафедраны ҚР мемлекеттік сыйлық лауреаты, филология, ғылымының докторы, профессор, Б. Қалиев басқарады. 1962 жылы ҚазМӘТУ-дің жанынан аспирантура ашылды. Содан бері қарай кафедра қазақ тілі, орыс тілі және жалпы тіл білімі мамандары бойынша үш ғылыми доктор (М.М.Копыленко, Т.Қоңыров, Ә.Ахметов), отыздан аса ғылыми кандидаттарын даярлап шығарды. Кафедраның оқу, тәрбие, ғылыми жұмыстарына Қазақстанның біраз көрнекті тілші-ғалымдары өздерінің қомақты үлестерін қосты. Олар: филология ғылыми докторы профессор — К.Аханов, Р.Әміров, Ә.Нұрмаханова, Т.Қоңыров, Ә.Ахметов, Б.Қалиев, Ф.Оразбаева; ғылым кандидаты, профессор — Ә.Хасенов, Ш.Бектұров, доценттер — Ә.Төлеуов, М.Атабаев, К.Жүнісбекова, 3.Ахтамбердиева т.б. Осы уақыт аралығында кафедрадан біраз ғылыми-әдістемелік еңбектер жарық көрді. Солардың бірі — "Тіл білімінің өзекті мәселелері" (1996).