Қазыбек Бейсенұлы Нұржанов

Қазыбек Бейсенұлы Нұржанов(1919, Қарағанды облысы, Ақтоғай ауданы, Ақтоғай ауылы - 1945, Беларусь, Гродно облысы,Волковыск қаласы) - 2-дүниежүзілік соғысқа қатысушы, барлаушылар взводының командирі, аға сержант,қазақ. Арғын тайпасы, Қаракесек руының Керней бұтағынан шыққан.

Қарқаралы педагогикалық техникумын бітіріп, Шет ауданында мұғалім қызметінде болды. 1939 жылы Кеңес әскері қатарына шақырылып, 1942 жылдың сәуірінен 2-Беларусь майданы 3-армия 5-атқыштар дивизиясы 61-жеке танкіге қарсы жойғыш дивизион құрамында Ұлы Отан соғысына қатысқан. Волга, Десна, Сож, Днепр, Друть, Березина өзендерінен өткен барлаушы Нұржановтың майдан жолы ерлік пен даңққа толы болды. Волковыск қаласы үшін болған ұрыста қаһармандық ерлік көрсетті. Шабуылдаушы топты басқарған ол қалаға бірінші болып кіріп, қаланы басып алды. Қала шетіндегі ұрыста ауыр жараланды. Нұржановқа ерекше ерлігі үшін КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (24.3.1945). Қарағанды қаласының бір көшесіне Нұржановтың есімі берілген. Ленин, Қызыл Ту, 3-дәрежелі Даңқ ордендерімен және «Ерлігі үшін», т.б. медальдармен марапатталған.