Қан жаңарту

Қан жаңарту — будандастырудың бір түрі. Қан жаңартуды қолданудағы мақсат - жалпы өнімдік қасиеті қанағаттанарлық, жергілікті жағдайға бейімделген мал тұқымының кейбір кемшіліктерін жою немесе өнімдік белгілерін жедел жетілдіру. Қан жаңарту нәтижесінде жергілікті тұқымның негізгі өнімдік бағыты бұзылмайды. Қан жаңарту жемісті болуы үшін жергілікті тұқым мен жақсартқыш тұқым бір рет қана шағылыстырылып, алынған ұрпақ тек жергілікті тұқыммен қайта шағылыстырылып, алынған буданның ұнамдылары өзара шағылыстырылып өсіріледі. Сонымен қатар, қан жаңарту пайдаланылатын жақсартқыш тұқым өнімділігі жағынан жергілікті тұқымға ұқсас, тек оның жергілікті тұқымда жетіспейтін өнімдік белгісі өте жақсы жетілуі шарт. Будандастырудың қан жаңарту түрі Қазақстан мал шаруашылығында жергілікті және жаңа шығарылған мал тұқымдарының өнімділігін арттыруда кеңінен пайдаланылып келеді.