Бітеуөзек

Бітеуөзек

Бітеуөзек (атрезия); (грек. atresia а — жоқ, tresis — тесік) — іштөлдері эмбриондық дамуы кезіндегі ауытқулардың салдарынан, олардың денелеріндегі табиғи тесіктердің жетілмеуі немесе болмауы.

Мысалы жаңадан туған нәрестенің немесе төлдің ас қорыту жүйесіндегі артқы тесіктің болмауын анус бітеуөзегі немесе анус атрезиясы деп атайды.

Бітеуөзектік фолликулдар

Бітеуөзектік фолликулдар (орыс. атретические фолликулы) — аналық жыныс безі — жұмыртқалықтағы фолликулдардың түрліше себептерге байланысты толық жетілмей, әртүрлі даму сатысында жетілу процесі тоқтаған фолликулдар. Бітеуөзектік фолликулдардың кері ыдырау процестері — жұмыртқа жасушасын қоректендіретін, оның сыртқы фолликул қабығы жасушаларының түрлі себептерге байланысты тіршілігін тоқтату кезеңінен басталады. Қоректік заттардың жетіспеуінен жұмыртқа жасушалары (овоциттер) де дамуын тоқтатып, кері ыдырай бастайды.

Нәтижесінде бітеуөзектік фолликулдар толығымен дәнекер ұлпасына айналып кетеді. Бірақ, олардың қуысыңда жұмыртқа жасушаларының мөлдір жылтырауық қабықшалары ұзақ сақталады. Егер ж9мыртқалықтағы бітеуөзектік фолликулдардың ыдырау процесі қалыпты жағдайдан ауытқып асқынса, онда бітеуөзектік фолликулдар қуысы сұйыққа толып, шамадан тыс үлкейіп, жұмыртқалық көпіршігіне (кистаға) ауысуы мүмкін.