Ақсүйектер (пьеса)

Ақсүйектер (орыс. Аристократы) — Н. Погодин пьесасы, Мұхтар Әуезовтың аудармалық еңбектері қатарына кіреді.

Мұнда кеңес өкіметінің алғашқы кезеңінде жаңа құрылыстың аяқ алысына ілесе алмай қалған ұры-қары, қаныпезер қарақшы, тағы сондай қылмысты топтар мен жаңа тәртіп жағдайында арамтамақ қанаушы тап өкілдері деп жарияланған адамдардың еңбекпен тузеу орындарындағы өмірі суреттеледі. Әуезовтің аудармасы бойынша алғашқы спектакль 1936 жылы Алматыдағы қазақ драма театрының сахнасында қойылды. Содан былай қарай 30-жылдардың аяғына дейін театрдың маусымдық репертуарына енгізіліп тұрды.

1937 жылы аударма пьесалардың баспадан шығаруға жоспарланған 2 жинағының 1-кітабына, Әуезовтің 20 томдық шығармалар жинағының 14-кітабына енгізілген. Сол кезеңде жаңадан қалыптасқан ұлттық сахна өнерін дамытуда, артистердің шеберлігін жетілдіруде едәуір рөл атқарған аударма пьесалардың қатарында саналады. Осы орайда Әуезов «Литературный Казахстан» журналының 1937 жылғы 4-санында: «...«Ақсүйектер» мен Ревизорды» аударып, театр ұжымымен бірлесе отырып, көп қызмет көрсетті. Сонымен қатар аудармаларда әрбір автордың стилін, әр заманның ұлттық, әлеуметтік ерекшеліктерін бере алдық деп ойлаймыз» деп жазды. Шынында Әуезов драманың негізгі идеясын, мазмұнын толық сақтап, шебер аударған. Қазақ КСР Ағарту халық комиссариатының 1939 жылы 15 ақпандағы №103 бұйрығында: «Ақсүйектердің» драма театрындағы қойылымы театр ұжымының шығармашылық жағынан іріленіп өскендігін, жалпы мәдениетінің артқандығын көрсетті» деп атап айтылып, сол үшін бүкіл ұжымға апғыс жарияланған («М. О. Әуезовтің өмірі мен шығармашылық шежіресі», 1997, 186-бет).