Байқау

Байқау:

• 1) философияда — негізгі таным тәсілдерінің бірі. Байқау арқылы нысанның әрекеті, ерекшеліктері, т.б. анықталады. Байқаудың зерттеу нысаны алдын ала белгіленіп, ұзақ уақыт бойы жүргізіледі. Арнайы жоспар жасалып, одан белгілі бір деңгейде нәтиже алу көзделеді. Алынған фактілерді сұрыптау, оған үнемі талдау жасау — Байқаудың негізгі міндеті. Байқау тікелей, жанама,ашық, жабық, табиғи және эксперименттік болып бөлінеді.
• 2) өнерде — өнерпаздар арасында әр түрлі деңгейде (халықаралық, республика, облыс, аймақтық, аудан, т.б.) өткізілетін мерзімдік өнер сайысы, конкурс. Байқау, көбінесе, музыка өнерінің белгілі бір түрінен (ән, би, күй) немесе жалпы көркемөнерпаздар арасында өтеді. Мысалы, Кеңес Одағы кезінде халық өнерпаздарының, көркемөнерпаздар ұжымдарының, эстрада әншілерінің Байқаулары тұрақты өткізіліп тұрды. Қазақстанда халықаралық, республикалық, аймақтық дәрежедегі әр түрлі Байқаулар өткізу дәстүрге айналған.
• 3) әскери істе — Жарғы ережелеріне сәйкес, әскери техникалар мен қару-жарақтардың, жауынгерлердің әзірлік деңгейлерін айқындау мақсатында жүргізілетін тексеру жұмыстары.