Бекен Жұмабекұлы Жамақаев

Бекен (Бекенғали) Жұмабеқұлы Жамақаев (1931, қазіргі Шығыс Қазақстан облысы Абай ауданы Саржал ауылы -1972, Семей қаласы) - әуесқой композитор, диктор, актер.

Арғын тайпасының Тарақты руынан шыққан.

Семей педагогика училищесін бітірген (1950). 1946-48 ж. Семей драма театрының (қазіргі Семей музыкалық драма театрының) құрамында актер. 1951 -52 ж. Семей облысы радиокомитетінде әдеби қызметкер, 1952 - 57 ж. цензор, 1958 - 60 ж. диктор, т.б. әр қилы мамандықта қызмет істеп, мәдениет саласында еңбек етті. Жамақаев жасынан өз бетінше әр түрлі музыкалық аспаптарда (домбыра, гармонь, баян, т.б.) ойнауды үйреніп, шебер музыкант атанды. Арнайы композициялық білімі жоқ. Оның халыққа кеңінен танымал "Сұлу сары", "Сауыншы", "Махаббат вальсі", "Қоштасу", "Түн сыры", "Гүлім қайда", "Ертіс әш", "Жалғыздық тойы", т.б. әндері бар. Жамақаевтың есімі Семей және Алматы қалаларында көшелер аталады.

Шығармасы: Махаббат вальсі. А., 1997.