Федор Сергеевич Берестов

Берестов Федор Сергеевич (10.1.1922, Шығыс Қазақстан облысы Глубокое ауданы Глубокое кенті - 27.10.1944, Латвия, Приекуле қаласы) - 2-дүниежүзілік соғысқа қатысушы, гвардия сержанты, бөлімше командирі. Соғысқа дейін Глубокое ауданындағы «Прогресс» ұжымшарында жұмыс істеді. Кеңес әскері қатарына 1941 жылы тамызда шақырылды. 67-гвардиялық атқыштар дивизиясы 201- гвардиялық атқыштар полкінің бөлімше командирі Берестов Витебск облысы Шумилов ауданы Ратьково ауылы маңында болған шайқаста ерекше көзге түсті. 1944 жылы 22 маусымда оның бөлімшесі жаудың қорғаныс шебіне бірінші болып кіріп, төбедегі дзоттан пулеметпен оқ жаудырды. 24 маусымда алғашқылардың бірі болып Батыс Двина өзенінен өтіп, бетпе- бет ұрыста 8 гитлершіні жойды. Латвияның Приекуле қаласын жау қолынан азат ету үшін болған шайқаста қаза тапты. Осы қаладағы бауырластар зиратына жерленді. Осындай қайсарлығы пен батылдығы үшін Берестовқа КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (24.3.1945). Берестов Ленин ордені, Қызыл Ту, 2-дәрежелі Отан соғысы ордендерімен, медальдармен марапатталды. Туған ауылы Глубокое кентінде Берестовқа мемориалдық тақта орнатылған.