Валерий Васильевич Лобановский

Валерий Васильевич Лобановский (укр. Валерій Васильович Лобановський; 6 қаңтар 1939, Киев, Украин КСР, КСРО — 13 мамыр 2002, Запорожье, Украина) — КСРО футболшысы, КСРО және Украиналық футбол жаттықтырушысы.

Валерий Лобановский
Жалпы мағлұмат
Лақап аттары	Мэтр, Полковник
Туған күні	6 қаңтар 1939 (1939-01-06)
Туған жері	Киев
Қайтыс болған күні	13 мамыр 2002 (2002-05-13) (63 жас)
Азаматтығы	КСРО Украина
Бойы	187
Позиция	шабуылшы
Клуб карьерасы 1957—1964 Динамо (Киев) 150 (43) 1965—1967 Черноморец (Одесса) 63 (20) 1967—1968 Шахтёр (Донецк) 53 (16) Ұлттық құрамы 1960—1961 КСРО 2 (0) 1963 КСРО (олимп.) 2 (0) Бапкерлік карьерасы 1968—1972 Днипро 1973—1982 Динамо (Киев) 1975—1976 КСРО 1976 КСРО (олимп) 1982—1983 КСРО 1984—1990 Динамо (Киев) 1986—1990 КСРО 1990—1992 БАӘ 1994—1996 Кувейт 1997—2002 Динамо (Киев) 2000—2002 Украина

Карьерасы

"Динамо" (Киев) клубын көп жыл жаттықтырған бапкер, екі рет бапкер ретінде УЕФА Кубок иелері кубогын (1975, 1986), бір рет УЕФА Суперкубогын (1975) ұтып алды. Бұл посткеңестік клубтар арасындағы ең жоғарғы көрсеткіш.

Үш рет КСРО құрамасының бапкері болды, 1975 жылы аз ғана уақыт жаттықтырса, екінші рет тізгінді 1982 жылғы әлем чемпионатынан соң қолға алды. Бріақ құрама 1984 жылғы Еуропа чемпионатына жолдама ала алмады да, ол қызметтен кетті.

1986 жылғы әлем чемпионаты басталғалы тұрған шақта тағы да құрама бапкері боп тағайындалды. Чемпионатты 6:0 есебімен Мажарстанды ұтып, керемет бастады. Францияның өзін артқа тастап, бірінші орынмен 1/8 финалға шықты да, күтпеген жерде Бельгиядан 3:4 есебімен ұтылып қалды. Арада екі жыл өткен соң Еуропа чемпионатының финалына шықты, бірақ сол кездегі теңдессіз Нидерланд құрамасы бұларды тоқтатты.

1990 жылы әлем чемпионатында КСРО құрамасы топтын шыға алмады да, қызметтен кетті. Кейін БАӘ, Кувейт, Украина құрамаларын және тағы "Динамо" (Киев) клубын жаттықтырды.

2017 жылы УЕФА оны Еуропа тарихындаға 10 ұлы бапкердің тізіміне қосты.

Бапкер жайлы пікірлер

Александр ХАПСАЛИС (Киевтің «Динамосында» 1978-1981 жылдары ойнаған):

– Мен оны пір тұтамын. Лобановский – футболшы болып қана емес, адам ретінде қалыптасуыма да орасан зор ықпал еткен жан. Қай елге, қай қалаға барсақ та, ол бізді театрларға, мұражайларға ертіп баратын. Жаттығу жиындарына кітапсыз келсек, дереу кері қайтарып жіберуден тайынбайтын. Бөлмемізге дейін келіп, шынымен кітап оқып отырмыз ба, әлде жәй жастанып жатырмыз ба, тексеруге ерінбейтін. Өзі өте көп оқыған адам еді, қандай сұрақ қойсаң да жауап бере алатын. Бізді де көпшілік алдында сөйлей білуге үйрететін, тіпті жанкүйерлермен кездесуде өзінен бұрын шәкірттеріне сөз беруге тырысатын. Қазір мен телекамера алдында тұрып журналистермен сағаттап сұхбаттасуға еш қиналмаймын, мұның өзі – Васильичтің арқасы. Біреулер оны «диктатор болыпты-мыс» деп жазады. Бірден айтайын: бос сөз! Рас, ол тәртіпті және ұқыптылықты жақсы көрді, шәкірттерінен де соны қатаң талап етті. Егер кешкі сағат сегізден соң біздің бірімізді бардан немесе мейрамханадан көріп қалса, әуелі ақшалай айып төлеттіретін, егер тағы қайталанса – командадан мүлде шығарып жіберуге дейін баратын.

Василий РАЦ («Динамоның» 1981-1990 жылдардағы ойыншысы):

– Лобановский кез келген ойыншының пікірін тыңдайтын. Бірақ бәрібір өз принциптеріне өте берік адам еді. Жиналыстарда әркімнің өз ойын ашық айтуын талап ететін. Өзі де кемшілікті тура бетке басып айтатын кісі еді ғой. Сол себепті де, ұжымда топқа бөліну, біреудің сыртынан әңгіме айту деген болған жоқ. Кейде «Лобановскийдің қаталдығы талай таланттың түбіне жетті» деген сөздерді естимін де, күлкім келеді. Керісінше, ол жүздеген талапты жасты шебер ойыншы етіп қана емес, тамаша адам етіп тәрбиеледі.

Жетістіктері

Ойыншы ретінде

«Динамо» (Киев)

• КСРО чемпионы: 1961
• КСРО кубогы: 1964

Бапкер ретінде

«Динамо» (Киев)

• КСРО чемпионы (8): 1974, 1975, 1977, 1980, 1981, 1985, 1986, 1990
• КСРО кубогы (6): 1974, 1978, 1982, 1985, 1987, 1990
• КСРО суперкубогы (3) : 1981, 1986, 1987
• Украина чемпионы (5): 1997, 1998, 1999, 2000, 2001
• Украина кубогы (3): 1998, 1999, 2000
• Куок иелері кубогы (2): 1975, 1986
• УЕФА суперкубогы: 1975
• Достастық кубогы (3): 1997, 1998, 2002

КСРО

• Жазғы Олимпиада ойындарының қола жүлдегері: 1976
• Еуропа чемпионатының финалисі: 1988

Кувейт

• Азия ойындарының қола жүлдегері: 1994
• Парсы шығанағы ұлттары кубогы: 1996

Жеке

• КСРО чемпионатындағы үздік 33 футболшыны (2): 1960 — № 2, 1962 — № 2
• КСРО спорт шебері: 1960
• Еуропадағы жыл бапкері (3): 1986, 1988, 1999
• Еуропа футбол маусымының үздік бапкері: 1985/86
• Әлемнің екінші бапкері: 1986 (версия World Soccer)
• Жылдың үздік Спорт бапкері: 1975
• Украинадағы жыл бапкері (5): 1997, 1998, 1999, 2000, 2002

Марапаттар

• «Құрмет белгісі» ордені (1971)
• «Украина қаһарманы» (15.05.2002)
• УЕФА ордені (қайтыс болған соң)

Сілтемелер

• http://www.national-football-teams.com/player/22339.html