Дулыға Досмахамбетұлы Ақмолда
Дулыға Досмахамбетұлы Ақмолда (1971 жылы 10 желтоқсанда Жамбыл облысы, Сарысу ауданы, Саудакент ауылында туған) - кино және театр актері, тележүргізуші. Қазақстанның еңбек сіңірген қайраткері (2010). Қазақстан жастар одағы сыйлығының лауреаты. Мұхтар Әуезов атындағы Қазақ мемлекеттік академиялық драма театрының актері.
| Дулылға Ақмолда | |
| Жалпы мағлұмат | |
|---|---|
| Туған күні |
10 желтоқсан 1971 (52 жас) |
| Туған жері | |
| Азаматтығы | |
| Мамандығы |
актер, тележүргізуші |
| Белсенді жылдары |
1993 - осы уақыт |
| Марапаттары |
 |
Жалпы мәлімметтер
өңдеуЖетіру тайпасының Тама руынан шыққан.
1971ж. Жамбыл облысы Сарысу ауданы Саудакент ауылында дүниеге келді. Байқадам орта мектебі және Саудакенттегі Ықылас атындағы музыкалық мектепті бітірді.
1993ж. Қазақ Мемлекеттік Т.Жүргенов атындағы Театр жәнЕ кино институтын (қазіргі Өнер академиясы) «Театр-кино актері» мамандығы бойынша бітірген. Театрда осы жылдан бастап қызмет етеді..[1]
Сахнадағы рөлдері
өңдеуҰлттық классика мен заманауи драматургияда: М.Әуезовтің «Абайында» Мағауия (реж. Ә.Мәмбетов), Керім (реж. Е.Обаев), «Айман-Шолпанында» Жарас (реж. Е.Обаев), М.Жұмабаевтың «Шолпанның күнәсінде» Әзімбай (сахналық нұсқа Ә.Тарази), Ғ.Мүсіреповтің «Қозы Көрпеш-Баян сұлуында» Жантық («Махаббат дастаны») (реж.Қ.Сүгірбеков), А.Сүлейменовтің «Кегінде» бекзада Сарын, «Жетінші палатасында» Рахат, «Қыздай жесір – штат қысқартуында» Дәріс (реж. Ә. Рахимов), Шахимарденнің «Томирисінде» Спаргапис, Шахимарден мен Қ.Ысқақтың «Қазақтарында» Мойынсыз (реж.Т. әл-Тарази), Т. Ахметжанның «Сұлу мен суретшісінде» Суретші (реж. Н. Жақыпбай), Қ.Мұхамеджанов, Ш.Айтматовтың «Көктөбедегі кездесуінде» Мәмбет (реж.О. Кенебаев), Д. Исабековтың «Жаужүрегінде» Троицкий (реж. Е. Обаев), С.Асылбекұлының «Империядағы» кешінде» Тойболды (реж. А. Кәкішева), М. Әуезовтің «Қилы заманында» Фонов (реж. Ә. Рахимов), И. Ғайыптың «Мен ішпеген у бар ма?…» спектаклінде Күнту (реж.О.Кенебаев), Т.Әбдіковтың «Ұлы мен ұры» қойылымында Ұры (реж. Е. Обаев, Е. Нұрсұлтан), Ғ. Есімнің «Таңсұлуында» Бақсы (реж. А. Кәкішева), Иран Ғайыптың «Қорқыттың көрінде» Қорқыт т.б. Әлемдік классика мен заманауи драматургияда: Шекспирдің «Асауға – тұсауында» Горацио (реж. Ә. Мәмбетов), «Ромео мен Джульеттасында» Ромео (реж. О. Салимов), К.Гоццидің «Турандот ханшайымында» Бригелла (реж. Т. әл-Тарази), Гогольдің «Ревизорында» Хлестаков («Пара», реж. Е. Обаев), «Үйленуінде» Кочкарев (реж. В. Захаров), Чеховтың «Шағаласында» Треплев (реж. Б. Атабаев), Кафканың «Құбылысында» Грегор Замза (сахналық нұсқа Е. Аманшаев, реж. Қ. Сүгірбеков) Г.Гауптманның «Ымырттағы махаббатында» Ганфельд (реж. Р. Андриасян), М. Кәрімнің «Ай тұтылған түнінде» Диуана («Күнәһар», реж. О. Кенебай), түрік драматургы Т.Жуженоғлының «Көшкінінде» Жігіт (реж. А. Кәкішева) т.б.
Кино рөлдері
өңдеу«Қыз жылаған» – Дулыға (реж. С.Нарымбетов, 2001), «Сардар» – Бекзада (реж. Б.Қалымбетов, 2002), «Біржан сал» -Сал (реж. Д.Жолжақсынов, 2009), «Егіздер» – Жандос (реж. А.Нарымбетов, 2011), «Ақсұңқар» – Сері («Хабар» арнасы, реж.М.Бидосов, 2010), «Мағжан» – Мағжан Жұмабаев (деректі фильм, 2013) т.б.
Белгілі актер телебағдарламаларға («Тамаша» телетеатры, «Әзілстан», «77 күн» бағдарламалары, «Хабар», КТК телеарналарындағышоулар) белсенді қатысқан, көркем және анимациялық фильмдердің қазақ тілінде көркем шығуына, яғни көркем дубляжға атсалысып жүр.
Атақты күйшілер Ықылас, Сүгір, Әйкен, Төлегендер шыққан өңірдің түлегі Дулыға – шертпе күйдің шебері, қобызшы, сазгер. Жас композиторлардың «Үкілі үміт» байқауының жүлдегері (1993).
Саяси көзқарасы
өңдеу2022 жылдың қарашасында Дулыға Ақмолда Almaty TV News арнасына сол жылғы президент сайлауы жайлы көзқарасын айтты: «әр Қазақстанның азаматы үшін жауапкершілігі мол, үлкен бір науқан болып есептеймін. Әркім өз таңдауын жасап, дауыс беру керек деп ойлаймын». Бейне түсірілген кезде болып жатқан Тоқаев реформаларын қолдап, «әркім... профессионалды үлкен көзқарас керек, сонда біз Жаңа Қазақстанға жетеміз деп ойлаймын» деген.[2] «Жаңа Қазақстан» концептін ойлап тапқан және қолдаған президент Қасым-Жомарт Тоқаев еді.[3]
Ақмолда ұлтшыл блогер Ерғали Көпеевпен бірге видеоға түскен, видеода ол Көппев пен онымен байланысы бар аталмаған тұлғаларды «патриоттар» деп атап, олармен кездесуінің өте жағымды болғанын айтып кеткен, көрермендерден Көпеевтің YouTube арнасына тіркелгенін және Көпеевтің өзін қолдауын сұрады.[4] Ерғали Көпеев Солтүстік Қазақстан облысыдағы сепаратизм мәселесін жиі көтергені үшін белгілі.[5] Иесі Көпеев болып келетін «Кенесары сарбаздары» Youtube арнасының сипаттамасында арна авторларының «Қазақстандағы казактыққа» қарсылығы жазылған.[6]
Марапаттары
өңдеу- Театрдың дәстүрлі «Театр көктемі» фестивалі, сондай-ақ республикалық және халықаралық театр фестивальдерінің (Корея, Түркия) бірнеше мәрте жүлдегері.
- 2002 жылы Қазақстан жастар одағы сыйлығының лауреаты
- 2010 жылы Қазақстанның еңбек сіңірген қайраткері құрметті атағы.
- Қазақстан Театрлар Ассоциациясның «Сахнагер – 2017» Ұлттық театр сыйлығының «Үздік актер» аталымы бойынша марапатталды. (Астана 27 наурыз 2017 жыл);
Дереккөздер
өңдеу- ↑ Қазақ мәдениеті. Энциклопедиялық анықтамалық. Алматы: “Аруна Ltd.” ЖШС, 2005 ISBN 9965-26-095-8
- ↑ Саяси науқаннан ешкім тыс қалмауы керек – Дулыға Ақмолда (қаз.). Almaty TV News.
- ↑ ТОҚАЕВ, Қасым-Жомарт Мемлекет басшысының 2022 жылғы 16 наурыздағы «Жаңа Қазақстан: жаңару мен жаңғыру жолы» атты Қазақстан халқына Жолдауын іске асыру жөніндегі шаралар туралы (қаз.). Қазақстан президентінің ресми сайты (29 наурыз 2022). Тексерілді, 29 тамыз 2023.
- ↑ Дулыға Ақмолда & Ерғали аға (қаз.). Almaty TV News.
- ↑ "Орыс аюы" иек астында. Солтүстік өңірдегі жұртты не мазалайды? (қаз.). Азаттық радиосы (29 желтоқсан 2020). Тексерілді, 29 тамыз 2023.
- ↑ ЕРГАЛИ АГА Kenesary Sarbazdary.
| Бұл мақалада еш сурет жоқ.
Мақаланы жетілдіру үшін қажетті суретті енгізіп көмек беріңіз. Суретті қосқаннан кейін бұл үлгіні мақаладан аластаңыз.
|