Магниттік диэлектриктер

Магниттік диэлектриктер

Магниттік диэлектриктер — магниттік ұнтақ (ферромагнетиктер және ферримагнетиктерден жасалған) пен диэлектрлік байланыстырғыштың (бакелит, полистрол, резина, тальк, шайырлар, сұйық шыны, т.б.) конгломераты болып табылатын композициялық магниттік материалдар; макрокөлемде байланыстырғыштың мөлшері мен типіне тәуелді өте жоғары кедергісі бар заттар. Магниттік диэлектриктер магнит жұмсақ және қатты магниттік материалдар болып ажыратылады. Магниттік жұмсақ Магниттік диэлектриктерді, негізінен карбонилді темір (бірнеше МГц-тен 100 МГц-ке дейінгі жиіліктер үшін), альсифер (0,7 МГц-ке дейін) немесе молибдендік пермаллой (0,3 МГц-ке дейін) ұнтақтарынан жаныштау (престеу) әдісімен алады; оларды 104 — 108 Гц жиіліктерде жұмыс істейтін радиотехника қондырғылардың дросселдерін, сүзгілерін, индуктивті орамалардың өзекшелерін дайындауда қолданады. Магниттік қатты Магниттік диэлектриктер альни (Fe — Nі — Al — Cu), альнико (Fe — Nі — Al — Co), ферриттер қорытпаларының ұнтақтары негізінде дайындалады. Осындай Магниттік диэлектриктердің коэрцитивтік күші массивті магнит материалдарға қарағанда ондаған пайызға, ал қалдық индукциясы 2 еседей төмен болады. Магниттік диэлектриктер өлшеуіш приборлар жасауда (тұрақты магниттер, ағытпалы қосылғыштардың эластикалық герметизаторлары, т.б.) қолданылады.

Дереккөздер

• Қазақ энциклопедиясы