Рахметолла Ғұбайдоллаұлы Ғұбайдуллин

Рахметолла Ғұбайдоллаұлы Ғұбайдуллин (17 қыркүйек 1930, Бегайдар ауылы, Новобогат ауданы Гурьев облысы – 2001, Ақтау) — заң қызметкері. 3-ші дәрежелі мемлекеттік әділет кеңесшісі (1979).

Рахметолла Ғұбайдоллаұлы Ғұбайдуллин
Туған күні	17 қыркүйек 1930 (1930-09-17)
Туған жері	Бегайдар ауылы, Новобогат ауданы Гурьев облысы
Қайтыс болған күні	2001 (2001)
Қайтыс болған жері	Ақтау
Азаматтығы	КСРО  Қазақ КСР  Қазақстан
Қызметі	Заңгер
Марапаттары мен сыйлықтары	КСРО прокуратурасының құрметті қызметкері Ақтау қаласының Құрметті азаматы

Өмірбаян

Рахметолла Ғұбайдоллаұлы Ғұбайдуллин 17 қыркүйек 1930 жылы Бегайдар аулында Новобогат ауданы Гурьев облысы дүниеге келді. Руы Есентемір, Қожамбет бөлімі Кіші жүзден тараған.

1946-1949. Гурьев қалалық халық сотының хатшысы. Гурьев облыстық прокуратурасының тергеу бөлімінің хатшысы.

1948 жылы Жамбыл атындағы орта мектепті бітірді.

1949-1955. Алматы мемлекеттік заң институтының бітірген.

1953-1954. Гурьев облыстық Әділет басқармасының консультанты, Гурьев облыстық денсаулық сақтау бөлімінің жұмылдыру жұмысы жөніндегі инспекторы.

1955-1965. Гурьев облысы прокуратурасының тергеу бөлімінің прокуроры, Гурьев облысы прокурорының аға көмекшісі, Гурьев облысы прокуратурасының тергеу бөлімінің бастығы.

1965-1970. Индер ауданының прокуроры.

1970-1971. Гурьев облысы прокуратурасының тергеу бөлімінің бастығы.

1971-1973. Гурьев облысы прокурорының тергеу жөніндегі орынбасары.

1973-1977. Маңғыстау облыстық партия комитетінің әкімшілік және сауда-қаржы бөлемімнің меңгерушісі.

1977-1987. Маңғыстау облысының прокуроры.

6 наурыз 1979 жылы КСРО Жоғарғы Кеңесі Президиумының Жарлығымен 3-ші дәрежелі мемлекеттік әділет кеңесшісі (генерал-майор) шені берілді.

Еңбек қызметі

Заң институтына мемлекеттік сынақтарды тапсыру ыңғайы 1955 жылы келді. Менімен бірге Гурьевтен Білялов Тәрен, Жапаров Ғайса, Қайнарбаев Әділгерейлер институт бітірді. Бұлар қазірде Атырауға белгілі ел азаматтары. Әділгерейдің дүниеден кеткеніне бірнеше жылдың жүзі болып қалды. Иманы жолдас болсын, аңқылдаған ашық, досқа жаны таза еді. Такең мен Ғайсекең менен жастары үлкен, ағалықтары бар. Екеуі де институтты қызыл дипломмен бітірді. Мемлекеттік емтихан комиссиясы әсіресе Ғайсекеңнің білім деңгейін ерекше атағаны жадымда. Институт бітірерде Тәрен ағамызды ЦК-ға шақырып, ауылшаруашылығының экономикасын көтеру мақсатында колхоз, совхоздарға басшы жұмыстарға баруы керектігін айтыпты. Бұл ретте Такеңнің институтқа дейін ауылшаруашылығында әр-түрлі жұмыстарда болғаны ескерілген болар. Сонымен Такең «сельхозник» атанып, совхоз директорынан облыстық ауылшаруашылық басқармасының басшысына дейін көтеріліп, қажырлы еңбегі, ұйымдастырушылық қабілеті жоғары бағаланды.

1955 жылы 10 қарашада облыстық прокуратураның тергеу бөліміне жұмысқа шақырылдым. Ол кезде облыс прокуроры Ғұбайдолла Лұқбанов еді. Тергеу бөлімінің прокуроры болып тағайындалдым. Бұл лауазым тергеу бөлімі бастығының жәрдемшісі деген сөз. Бөлім бастығы Әбішев Дәуіт тәжірибесі мол, жұмыста ұқыпты, тыянақты еді. Прокуратурадағы жұмыстардың қыр-сырына үңіліп, ол кісіден көп нәрселерді үйрендім. Аппаратта әр жылдары істеген облыс прокурорының орынбасарлары Мадияр Молдалиев, Анатолий Парнищев, жауапты қызметкерлер Төреғазы Арынғазиев, Төкен Қуанышев, Еркін Сүлейменов, Сұңғат Мұқанғалиев, Сатан Шөреев, Жәмит Өтемұратов, Тоқтар Өтелбаев, Уақыт Қасаев, Халит Орақов, Фамшах Құтқожин, Тапишев Смағұл, Охас Хасанов тағы басқа көптеген тәжірибелі қызметкерлермен жұмыс бабында аралас-құралас болдым. Олардың қай-қайсысының да басқаға үлгілі боларлықтай жақтары баршылық, ең бастысы – өз істеріне шын берілген адамдар. Осының өзі жас мамандарға үлкен мектеп еді. Арамызда жұмыс бабын пайдалануға бейім тұратын, адамдар арасына іріткі салатын, бастықтар алдында жағымпаздық көрсететін екі бетті оңбағандар да болмай қалған жоқ. Олардың саны жалғыз-жарым болды да, дер кезінде әшкереленіп отырылды.

Отбасы

Әкесі – Зұлқашұлы Ғұбайдолла (1897-1977), анасы - Ақкенже Қосқұлақ қызы. Дүниеге әкелген үш ұл Әтиғолла, Рахметолла, Меңдолла және бір қыз Нәсіп.

Марапаттары

30 наурыз 1970. "Еңбектегі ерлігі үшін" медалі.

21 мамыр 1981. "Құрмет белгісі" ордені.

16 шілде 1986. "Халықтар достығы" ордені.

"КСРО прокуратурасының құрметті қызметкері" төс белгісі.

Әлденеше рет республиканың Жоғарғы Кеңес, партияның Орталық Комитетінің, кәсіподақ орындарының, КСРО Бас прокурорының Мақтау Грамоталарымен мен алғыс хаттарымен марапатталған.

Ақтау қалалық әкімшілігі мен мәслихаты шешімімен "Ақтау қаласының Құрметті азаматы".

Жарияланымдар

Рахметолла Ғұбайдоллаұлы. “Әділет жолы”. 1986