Сулги Лутфуллин

Сулги Лутфуллин(5.1. 1923 жылы туған, Алматы облысы,Панфилов ауданы,Жаркент қаласы - 1991, Әндіжан) - 2-дүниежүзілік соғысқа катысушы, аға сержант, кейіннен кіші лейтенант, зеңбірек командирі. Лутфуллин Кеңес әскері қатарына 1942 жылы Панфилов ауданы әскери комиссариатынан шақырылды. Ол 493-танкіге қарсы ататын артиллерияның құрамында Висла мен Одер өзендерінен өтудегі ұрыстарда ерекше көзге түсті. Висланың батыс жағалауындағы плацдармды кеңейту үшін жүргізілген ұрыста Лутфуллиннің зеңбірегі дұшпанның 4 танкісін және 2 бронетранспортерін қиратып, 140 әскері мен офицерін жойды. 1944 жылы 18 тамызда Лутфуллин басқарған зеңбірек өз бөлімінен бөлініп қалды. Жаудың 12 танкісі мен автоматшылар десанты Кеңес әскерінің аз ғана жауынгерлеріне қарсы шабуылға шықты. Артиллеристер жаудың 8 шабуылына тойтарыс беріп, 5 танкісін өртеп жіберді, 30-дан астам әскерін жойды. 1944 жылдың соңында 1-Украина майданының құрамалары Одер өзеніне жақындады. Жау осы жерде мықты қорғаныс бекіністерін салып, алғашқы күннен бастап Одер үшін кескілескен ұрыс жүргізді. Өзеннен өту кезінде Лутфуллиннің зеңбірек расчеті ерекше көзге түсті. Нейдорф елді мекені үшін болған ұрыста оның зеңбірегі жаудың 3 танкісі мен 2 бронетранспортерін қиратты. Герцог Свальдау елді мекені үшін шайқаста жаудың 13 танкісі шабуыл жасады. Артиллеристер дәлдеп атып, жаудың 5 танкісін қиратты және 30-дан аса әскерін жойды. Көп кешікпей жаудың 6 танкісі мен автоматшылар десанты отырғызылған 2 бронетранспортері қарсы шабуылға шықты. Зеңбіректің снарядтары бітіп қалғаннан соң Лутфуллин расчетінің жауынгерлері гранаталармен қаруланып, жау шабуылына тойтарыс берді. Лутфуллинге көрсеткен ерлігі үшін КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (19.4.1945). Ленин, 2 рет l-дәрежелі Отан соғысы ордендерімен, медальдармен марапатталған. 1945 жылы кіші лейтенанттар курсын бітіріп, 1946 жылы запасқа шықты. Әндіжан қаласында (Өзбекстан) тұрды. 1964 жылы Сауда институтын бітіріп, сол салада жұмыс істеді.