Уикипедия:Қазақша Уикипедияның негізгі тілі — қазақ тілі

Қазақша Уикипедия логотиптерінің бірі

Уикипедияның қазақ тіліндегі бөлігі қазақша Уикипедия деп аталады. Қазақша Уикипедияның негізгі тілі және бірден бір тілі — қазақ тілі. Қазақша Уикипедиядағы барлық әрекеттерде басқа тілдердің бәсекелестігіне жол берілмейді. Қазақша Уикипедия мемлекетке және саясатқа еш қатыссыз болғандықтан Қазақстандағы үш тұғырлы тіл саясатына да еш қатысы жоқ және оны орындауға міндетті емес тек қазақ тілі ғана мойындалады. Басқа тілде жазылған мақалаларға, Уикипедия есім кеңістігіндегі және анықтамалық беттерге, санат, жоба, портал беттеріне орын жоқ! Олар жедел және міндетті түрде жойылып отыратын болады.

Қазақша Уикипедияға үлес қосу үшін келесі ережелерді сақтаңыз:


  • Үлгі есім кеңістігіндегі беттерден кейбір жағдайларда ғана ағылшын тілінде бастауға рұқсат етіледі, басқа жағдайларда орыс, түрік және басқа тілдерде жазуға, өзгеріссіз (аудармай) басқа Уикипедия тіл бөлімдерінен еселеуге тыйым салынады.



  • Мақалаларды қазақша сауатты, грамматикалық, орфографиялық қателерсіз жазу талап етіледі.


  • Шала аударылған және машиналық аудармаларды (әртүрлі онлайн және офлайн аударғыш сайттар мен бағдарламалар арқылы аударылған мәтіндер, өзге тілді адамдардың аудармалары) сонымен қоса басқа тілде жазылған мақалаларды қоспаңыз, ондай жағдайда админдер ескертусіз бірден жояды. Мақаланы немесе үлгіні басқа тілден жартылай аударып қоспаңыз (толық аударыңыз немесе аудара алмайтын бөлігін мақалаға қоспаңыз).


  • Қазақ тілінде бұрын болмаған және көпшілік мойындамаған сөздерді қолданбауға тырысыңыз. Мақалаға бірнеше атаумен болу керек деп есептесеңіз басқа тілдерден бағыттағыш жасамаңыз (ерекше жағдайлар мен халықаралық қолданыстағы грек, рим, ағылшын, араб сөздері, және қазақ тіліне енген парсы, араб кірме сөздері). Мақалаға сипаттама ретінде қазақша атауынан кейін көрсетілетінін ескеріңіз мысалы: «Ресурстар қарғысы (ағылш. resource curse)». Осыны «resource curse» деп мақаланы қайта бастаудың немесе негізгі мақаласына бағыттаудың қажеті жоқ. Басқа тілдерді меңгергеніңізді білдіргіңіз келсе жеке бетіңізге тіл үлгілерін қолдану арқылы көрсетіңіз немесе басқа тілдерден мақалалар аударыңыз. Сондай-ақ осы жобаның интерфейсін аударуға көмек беріңіз.


  • Талқылау беттерінде (талқылау беттеріне форумда кіреді) қазақша әдеби тілде жазыңыз. Сіздің әр әрекетіңіз көпке үлгі болуы мүмкін екенін ескеріңіз.