Хадиша Баязитова

Баязитова Хадиша (01.01.1938 - 24.06.2020, қазіргі Түркістан облысы, Шәуілдір ауданы) – ұстаз, публицист, ақын, Қазақ КСР оқу ісінің үздігі (1980), «Күміс алқа» иегері (2003). Шымкент педагогикалық институтының түлегі (1957). Жаңақорған ауданы №51 орта мектеп мұғалімі (1962-69), №162 орта мектеп директоры (1969-82) , №125 орта мектеп директоры (1982-92) қызметтерін атқарған. 1993 жылдан бастап "Аудандық мұсылман әйелдері қоғамының" жетекшісі. Баязитова ширек ғасыр ішінде жергілікті оқу-ағарту ісінің дамуына, жас ұрпаққа білім мен тәрбие беру саласына зор үлес қосты. Ол кісі басқарған мекемелер облыстағы алдыңғы қатарлы мектептер санатынан орын алды. Облыстағы қоғамдық істерге де белсене араласып, елдегі оқу-ағарту, тәрбие ісі, әлеум. мәселелер жөнінде ұсыныс-пікірлерін бұқаралық ақпарат құралдарына жариялап отырды. Сыр өңірінің қоғамдық өміріне белсене араласқан әйел-аналардан жасақталған делегация құрамында Тұңғыш Президент Нұрсұлтан Назарбаевтың қабылдауында екі мәрте болды. Баязитованың «Бақытымды босағамнан күтемін» жинағына (2006) әр жылдары Республика, облыс, аудан көлеміндегі баспасөз беттерінде жарық көрген өлеңдері мен толғаныстары, естелік, мақалалары топтастырылған. КСРО Оқу министрлігінің Құрмет грамотасымен (1986), Қызылорда облысы Кеңесінің Құрмет грамотасымен (1988), Қазақстан Республикасының Президенті Нұрсұлтан Назарбаевтың алғыс-хатымен (16.12.2001) марапатталған.

Дереккөздер

«Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 жыл, ISBN 5-89800-123-9, II том