Шолақтау қонысы

Шолақтау – төменгі палеолит дәуірінің шелль-ашель кезеңіне жататын қоныс. Жамбыл облысы Қаратау қаласының оңтүстігінен 5 км жерде орналасқан. 1958 жылы Қазақстан ғылым академиясының Ш. Уәлиханов атындағы Тарих, археология және этнография институтының палеолит экспедициясы (жетекшісі І.Алпысбаев) зерттеген. Шолақтаудан қара малта тастан жасалған өзектас, үшкіртас, тілікше, тас жаңқалары, қол шапқылар, т.б. тас құралдары табылды. Олардың сыртқы құрылысы, пайдаланған тасы және жасалу тәсілдері әлемдік деңгейдегі Еуразия ерте палеолит ескерткіштерімен үндеседі. Шолақтау қонысының материалдары Қазақстан жері плейстоцен кезеңінде алғашқы адамдар тіршілік еткен аймақтардың бірі болғандығын дәлелдейді.