Ғұбайдолла Әнесұлы Көшеков

Ғұбайдолла Әнесұлы Көшеков (1923, Казталов ауданы, Жалпақтал а. - 13.1. 1943, сонда) — кеңестік коммунистік режимге, сталиндік тоталитарлық саясатқа қарсы шыққан қайраткер. Әкесі Әнес шаруашылықта ұста, шешесі Жаңыл сауыншы болған. Ғұбайдолла жастайынан зерек, сабаққа алғыр болып өскен, өлең жазған. Қазақ жастарын ерлікке, елдікке шақырған «Қарап жатпа» атты поэмасы сақталған. 7-класқа дейін қазақша, 8-класты орысша оқыған. 1938 ж. БЛКЖО мүшелігіне өткен. Елдегі хал-ахуалдың ауырлап кетуіне байланысты 1940 ж. 9 және 10-класты қатар оқып бітірген. Сол жылы Орал мүғалімдер институтының физика-математика факультетіне қабылданған. 1941 ж. қыркүйек айында Фурманов (қаз. Жалпақтал) ауылында жастардың «Қазақ халқын қорғау одағы» атты жасырын ұйымын құрып, КСРО мен Қазақ КСР-ы үкіметі басшыларына хат жазуды, тұрғындар арасында үнпарақтар таратуды ұиымдастырған. Сол үшін 1941 ж. 22 желтоқсанда ұйым мүшелері тұтқынға алынған. Ұйым жетекшісі К. КСРО Ішкі істер халық комиссариатының жергілікті айрықша кеңесінің («үштігінің») шешімімен Жалпақтал ауылында ату жазасына кесілген. 1993 ж. ҚР Бас прокуратурасының қаулысымен толық ақталды.