Қазақ өнері (энциклопедия)

Қазақ өнері - 2002 жылы Алматы қаласындағы Қазақстан даму институтының «Білік» редакциялық - баспа орталығынан қазақ тілінде жарық көрген ұлттық көркем өнері туралы тұңғыш энциклопедия; көлемі 800 бет. Бас редакторы - К.Ә.Нұрпейісов, құрастырушы-жауапты редакторы А.Ж.Құдабаев. «Қазақ өнері» энциклопедиясында қазақтың сәулет пен бейнелеу өнері, музыка мен би, кәсіби театр өнері мен балет, кино мен цирк және эстрада өнерінің тарихи тұрғыдан туып қалыптасуы мен жан-жақты өркен жаюы, даму процесі мен жетістіктері, әрі оның дүниежүзілік мәдениет шежіресінде алатын орны, оған қоса түркі тілдес елдер өнерімен тамырлас туыстығы мен өзара тығыз байланысы, өнертану терминдері мен ұғымдары, өнер ұйымдары мен ұжымдары, жалпы сәулет пен өнер түрлері, сан-алуан жанрлары, тағы басқалары жайында жазылған мақалалар қамтылған.

Сан ғасырлық тарихы бар ұлттық өнер мен оның өсіп-өркендеуіне өз тұсынан айтарлықтай үлес қосқан атақты сәулетшілер мен суретшілер, әншілер мен күйшілер, композиторлар мен дирижерлер, актерлер мен режиссерлер, өнертанушылар мен тағы басқалары өнер мамандары жайында да қысқаша ғұмырнамалық мақалалар енгізілген. Энциклопедияда қазақтың көркем мәдениетіне, әсіресе ұлттық музыка мен театрына аса елеулі үлес қосқан біртуар өнер қайраткерлері қатарында ұлы ғалым Қаныш Сәтбаевтың (236, 372, 657-бет, тағы басқалары) есімі де аталған. «Қазақ өнері» энциклопедиясы өнер қайраткерлеріне, ғалымдар мен аспиранттарға, жоғары және орта арнаулы өнер мектебінің ұстаздары мен шәкірттеріне, сондай-ақ жалпы өнер сүйер оқушы қауымға арналған.