Әулиеата уезі қазақтарының петициясы

Әулиеата уезі қазақтарының петициясы – 1905 жылы қарашада Әулиеата уезі қазақтарының Ресей империясы Министрлер Кеңесінің төрағасы граф С.Ю. Витте атына жолдаған арыз-тілегі. Телеграф арқылы жолданған бұл арыз-тілекке 50 адам қол қойған. Оны ұйымдастырушылар қатарында Ә.Кенесарин болған. Арыз-тілекте патша өкіметінің отаршылдық саясатына наразылық танытылып, қазақ балаларының ана тілінде білім алуына мүмкіндік беретін мектептер ашу, Түркістан өлкесінде өз алдына дербес діни басқарма құру талап етіліп, қоныс аудару саясатының тоқтатылу қажеттігі аталып көрсетілді.