Шығыс Қоңырат молибден-вольфрам кен орны

Шығыс Қоңырат молибден-вольфрам кені, Қарағанды облысы Ақтоғай ауданында орналасқан. 1934 ж. ашылды; барлау 1941 ж., пайдалану 1942 ж. басталған. Кен жоғарғы девон мен төменгі карбонның шөгінділік-метаморфтық, эффуз.-туфогендік тау жыныстарын қиған Қоңырат гранит массивінің шығыс бөлігінде орналасқан. Граниттердегі тіктеу құлаған тау жыныстарын толтырған кварц желілері кен денелері болып саналады. Жеке кен денелерінің қалыңд. бірнеше см, ұзындығы ондаған, жүздеген метрге дейін жетеді. Екі кенді белдемде 60 кен денесі шоғырланған. 28 желінің өндірістік мәні бар. Кентас минералдарына: молибденит, пирит, вольфрамит (кварц желілерінде), галенит, сфалерит, флюорит, рутил, сфен (грейзендерде) жатады. Өңделетін металдары: молибден, вольфрам; аз мөлшерде рений, теллур, селен, скандий алынады. Кен орнының гидрогеологиялық жағдайлары пайдалану жұмыстарын жүргізуге қолайлы. Өндірілген кен Балқаш кен байыту фабрикасына жөнелтіледі. Кен гидротермалдық типке жатады.

Сілтемелер

• "Қазақ Энциклопедиясы", 9 том