Маңғыстау облыстық қуыршақ театры
Маңғыстау облыстық қуыршақ театры – мәдени-сахналық өнер ұжымы.
| Маңғыстау облыстық қуыршақ театры | |
|---|---|
| |
| Орналасуы |  Қазақстан Ақтау |
| Негізделгені | 1980 |
| Директоры | Фарида Атакеева |
| Бас режиссёрі | Надежда Насырова |
Тарихы
1980 жылдары Қазақ КСР-і Министрлігі Кеңесінің және Шевченко облыстық атқару комитетінің шешімімен облыстық қуыршақ театры ашылды. Театрдың ашылуына сол кездегі жас қалаға бұрынғы кеңес елінің түпкір-түпкірінен келген әр ұлттың кәсіби мамандары, олардың отбасылары мен балаларының келуі, сонымен бірге жас көрермендерге өздерінің балаға тән өмірлік түйсік-түсінігіне орай ой-өрісі мен сана-сезімін, таным табиғатын жан-жақты ояту мақсатын көздеушілік себеп болды. Театр ұжымын ашуда сол кезеңдегі облыстық мәдениет басқармасының бастығы Д.Б. Орынбаева қажырлы еңбек сіңірді. Алғашында театр Ақтау қаласының 4-ықшам ауданындағы "Парус" клубын иелік етті. Бірақ бұл клубтың театрға аса лайықты болмауына қарамастан театр директоры Н.А. Манохин, бұрынғы кеңес елі қалаларындағы (Ярославль, Тюмень, Саратов, Нижний Новгород) жоғары оқу орындарын бітірген Л. Артеменко, А. Загретдинова, Г. Иванов, Н. Насырова, Ю. Семенченко, Е. Смирнова, Л. Суханова сияқты жас мамандар, оларға жетекшілік еткен О.Л. Карнер (бұрынғы Ленинград, қазіргі Санкт-Петербург қаласынан) мен бас суретші В.В. Фомичев көп еңбек етті.
Театр шымлдығы 1981 жылдың 6 қаңтарында В. Катаевтың пьесасы бойынша қойылған "Цветик-семицветик" спектаклімен ашылды.
1988 жылы театрдың қазақ труппасы ашылды. Облыстық әкімшіліктің қолдауымен театр ғимараты жөнделіп жаңартылды, көрермендер залы салынып, оның материалдық базасы нығайтылды.
Қойылымдары
Тек балалар емес, жасы үлкен көрермендерге арналған қойылымдар қойған кездері болды: И. Штоктың пьесасы бойынша "Таңғажайып комедия", "Қуыршақтар күледі де жылайды" (1981), В. Сатаевтың пьесасы бойынша Тарас Шевченконың Маңғыстаудағы өмірін бейнелеген "Адамсыз жапан дала" (1984) атты спектакльдері көрермендер қошеметіне бөленді.
Театр жетістіктері
- Театр ұжымы 1982 жылдары "Жігер" жастар шығармашылық фестивалінің дипломанты атанды.
- 1987 жылы Қостанай қаласында өткен Қазақстан қуыршақ театрларының 1-республикалық фестиваліне қатысып, фестиваль лауреаты атанды.
- 1989 жылы Шымкент қаласында Халықаралық фестивалінде "Алдар көсе хикаясы" атты ұлттық спектакльді көрсетіп "ең үздік режиссура" сыйлығына ие болды.
- 1992 жылы Петропавл қаласында өткен фестивальда театрдың "Шашу" спектаклі режиссерлік тапқырлығымен ерекшеленіп "ең үздік қойылым" ретінде аталды әрі УНИМА альманахына жазылды.
- 2002 жылы театр труппасы ҚР мемлекеттік қуыршақ театрларының 1-республикалық фестиваліне қатысып "ең үздік әйел рөлі" және "ең жас актерлік үздік дебютті" номинацияларын иеленді.
- Ресейдің Орынбор қаласында өткен "Орынбор қарбызы" атты 2–3-халықаралық қуыршақ театрларының (2003, 2006) және Ақтөбе қаласында өткен "Ассалаумағалейкум" атты 1-халықаралық қуыршақ театрларының дипломанты болды. Театрда С. Серовтың "Иван ақымақ қалай патша болды", Л. Дворскийдің "Түлкі, қоян және әтеш" спектакльдері қойылды.
Театр ұжымы Орынбор қаласындағы "Пьеро" муниципиалдық театрымен тығыз шығармашылық байланыс жасап келеді, облыс көлеміндегі қала, аудан мен ауылдарда, Ақтөбе мен Атырау өңірінде, сонымен қатар Ресейде, Түрікменстанда, Қарақалпақстанда да гастрольдік сапарлармен барып тұрады.[1]
Дереккөздер
- ↑ Маңғыстау энциклопедиясы, Алматы, 1997;