Назарбаев Зияткерлік мектептері
Назарбаев Зияткерлік мектептері — ғылым, экономика және саясат саласында дарынды балаларға арналған Қазақстандағы таңдаулы мектептер желісі.[1]
| Назарбаев Зияткерлік мектептері | |
 | |
| Негізгі ақпарат | |
|---|---|
| Құрылды |
2008 - қазіргі кезге дейін |
| Түрі |
Физика-математика бағытындағы зияткерлік мектептер, химия-биология бағытындағы мектептер, Халықаралық Бакалавриат |
| Мекенжайы | |
| Тілі |
Қазақша, орысша, ағылшынша |
| Сайты | |
Бұл мектепте "критериалды бағалау" деп, аталатын бағалау жүйесі қолданылады. Зияткерлік мектепте білім берудің екі моделі жүзеге асырылады. Бірінші модель – Жаратылыстану-математикалық бағыттағы Эксперименталды Ықпалдасқан білім бағдарламасын жүзеге асырады. Бұл бағдарлама бойынша оқушылар физика, математика, химия және биология пәндерін тереңдетіп, үштілді ортада оқиды.
Астана қаласы Зияктерлік мектебі оқушыларының ағылшын тіліндегі математика, физика, химия, биологиядан халықаралық SAT1 емтиханнан қорытынды баллы 1586 құрады, әлемде орташа балл - 1200 (ең көбі -1980 ), ал SAT2 орташа балл - 1720, әлемдегі орташа балл - 1250 (ең көбі - 2200). Ағылшын тілінен IELTS емтиханынан орташа балл - 6,2 (5,7 - өткен жылы). Тек бір оқу жылының ішінде халықаралық, республикалық, облыстық және қалалық олимпиадаларда жеңістер екі есе көбейді. Екінші модель - Негізгі және жоғары мектепте оқушыларды Халықаралық бакалавриат бағдарламасы бойынша оқыту. Бұл 35 жылдан астам тарихы бар, жоғары сапалы білім беретін бағдарлама ретінде әлемге танылған. Халықаралық бакалавриаттың дипломын 102 елдің 1300 астам университеттері мақұлдайды. Олардың ішінде Оксфорд, Гарвард, Кембридж экономика мектебі сияқты аттары әлемге әйгілі жоғары оқу орындар бар[2].
Тарихы
ҚР Президенті Н.Ә.Назарбаевтың бастамасы бойынша 2009 жылы Астанада алғашқы зияткерлік мектебі ашылды. Бес жылдың ішінде Зияткерлік мектептері еліміздің барлық өңірлерінде ашылған еді. Зияткерлік мектептерінде жоғары білікті педагогтар дәріс береді. Мектеп заманауи ғылыми-зертханалық және интерактивті мультимедиялық жабдықпен жарақтандырылған. Зияткерлік мектептің осы және басқа да ерекшеліктері балалардың жан-жақты дамуына жағдай жасайды.
"Назарбаев Зияткерлік мектептері" ДББҰ қазіргі таңда еліміздің әр өңірінде ашылған 21 мектепті қамтиды. ДББҰ ашылғаннан 2023 жылдың 6 наурызына дейін "Назарбаев Зияткерлік мектептері" ДББҰ басқарма төрағасы қызметін Шәмшидинова Күләш Ноғатайқызы атқарып келді. 2023 жылдың 6 наурызынан бастап басқарма төрағасы - Жанғозин Ануар.[3]
Аймақтардағы мектептер
Астана қаласы. Қазір Астанада екі түрлі бағытта оқытатын үш мектеп қызмет етеді. Бірі физика-математика, ал екеуі халықаралық бакалавриат бағытында оқытады.
- Физика-математика бағытындағы Назарбаев Зияткерлік мектебі. Астана қаласында Назарбаев Зияткерлік мектебі 2009 жылы 12 қаңтарда ашылды. Бұл Қазақстандағы Назарбаев зияткерлік мектептерінің алғашқысы. Мектеп жанында 200 орындық жатақхана бар.[4]
- Астана қаласындағы Назарбаев Зияткерлік мектебі. 2010 жылы 1 қыркүйекте Химия-биология бағытындағы Назарбаев Зияткерлік мектебі оқушыларға есігін айқара ашты. 2011 жылғы 12 шілдеде Халықаралық Бакалавриатта Астана қаласының химия-биология бағытындағы Назарбаев Зияткерлік мектебін авторизациялау туралы шешім қабылданды. Халықаралық Бакалавриат шеңберінде оқушыларға оқу бейінін таңдауда икемділік берілуіне байланысты химия-биологиялық бейін жойылып, мектеп Астана қаласындағы Назарбаев Зияткерлік мектебі болып өзгертілді.
- Астана Халықаралық мектебі 2013 жылы ашылды. Сол жылы мектепте 4 сынып және 10 мұғалім болса, 2014-2015 оқу жылында 400 оқушыға өсіп, 20 сынып болды. Сол оқу жылында 45 тәрбиеленушісі бар балабақша ашылды. Қазіргі таңда 1-12 сыныптарды қамтыған 66 сынып жиынтығы бар. Мектепте білім алушылардың саны 1200-ден асады.
- Семей қаласы. Семей қаласында 2009 жылы 1 қыркүйекте физика-математикалық бағытындағы Назарбаев Зияткерлік мектебі ашылды. Ол 2-ші атаулы мектеп болып табылады.[5]
- Талдықорған қаласы. 2010 жылдың 21 тамызында Талдықорған қаласында физика-математикалық бағыттағы Н.Назарбаев зияткерлік мектебі ашылды.[6] Ашылу рәсіміне елбасы Нұрсұлтан Назарбаев қатысты. Мектеп әлем стандарттарына сай салынған.
- Өскемен қаласы. Химия және биология бағытындағы Назарбаев Зияткерлік мектебі Өскемен қаласында «20 зияткерлік мектеп» мемлекеттік бағдарламасы аясында Қазақстан Республикасының Президенті Нұрсұлтан Әбішұлы Назарбаевтың бастамасы бойынша құрылып, 2010 жылдың 13 қыркүйек айында жұмысын бастады.[7]
- Орал қаласы. Орал қаласындағы физика-математика бағытындағы Назарбаев Зияткерлік мектебі 2012 жылы қыркүйек айының 29-шы жұлдызында ашылды. Мұнда аудандардан келген оқушыларға арналған 120 орынды жатақхана бар.
- Шымкент қаласы. 2013 жылдың 16 ақпан күні Шымкент қаласында физика-математика бағытындағы мектептің ашылу салтанаты өтті.[8] Бұл Қазақстан аумағындағы 9-шы атаулы мектеп. Басқа қаладан келген оқушыларғы арналған 120 орынды жатақхана бар. 2013 жылдың 25 ақпан күні Шымкент қаласында химия-биология бағытындағы мектептің ашылу салтанаты өтті.
- Ақтөбе қаласы. Физика-математика бағытындағы Назарбаев Зияткерлік мектебі Ақтөбе қаласының Батыс-2 шағын ауданында 2013 жылы 25 ақпанда ашылды. Мектеп 720 орынға есептелген. Ауылдан келген балалар үшін 120 орынға арналған жатақханасы бар.[9]
- Қарағанды қаласы. Қарағанды қаласындағы химия-биология бағытындағы Назарбаев Зияткерлік мектебі 2013 жылдың 1 ақпанында ашылды. Мұнда аудандардан келген оқушыларға арналған 120 орынды жатақхана бар.
- Көкшетау қаласы. 2013 жылдың 23 ақпан күні Көкшетау қаласындағы Назарбаев Зияткерлік мектебінде 7-сынып оқушыларын жаратылыстану - математикалық бағытындағы пәндерді оқуға деген қабілеттерін анықтауға арналған Джонс Хопкинс Университетінің «Дарынды жастар» орталығы жасаған психометрикалық тест өткізіледі. Мұнда қаладан тыс аумақтардан келген оқушылар үшін 130 орынды жатақхана бар.
- Тараз қаласы. Тараз қаласындағы физика-математика бағытындағы Назарбаев Зияткерлік мектебі 2013 жылдың 4-ші шілдесінде ашылды. Мұнда аудандардан келген оқушыларға арналған 120 орынды жатақхана бар.
- Павлодар қаласы. Павлодар қаласындағы химия-биология бағытындағы Назарбаев Зияткерлік мектебі 2013 жылдың 27-ші тамызында ашылды. Мұнда аудандардан келген оқушыларға арналған 120 орынды жатақхана бар.
- Қызылорда қаласы. Қызылорда қаласындағы химия-биология бағытындағы Назарбаев Зияткерлік мектебі 2013 жылдың 30-шы тамызында есігін ашты. Мұнда аудандардан келген оқушыларға арналған 120 орынды жатақхана бар.
- Атырау қаласы. Атырау қаласындағы химия-биология бағытындағы Назарбаев Зияткерлік мектебі 2013 жылдың 11-ші қыркүйегінде есігін ашты. Мұнда аудандардан келген оқушыларға арналған 120 орынды жатақхана бар.
- Алматы қаласы. Алғашқы мектеп 2014 жылдың 4-шi шiлдесiнде ашылды. Алматы қаласындағы Физика-математика бағытындағы Назарбаев Зияткерлiк Мектебiнде 762 оқушы бiлiм алуда. Мектеп "Таулы қырат" ауданында орналасқан. Алматы қаласында химия-биология бағытындағы НЗМ 2015 жылдың тамыз айында ашылған. Мектепте 1150 бала 45 сыныпта. ХББ мектептің аумағы НЗМ желісінде ең үлкен болып саналады. Жатақханасы 4 қабатты.
- Қостанай қаласы. Қостанай қаласындағы физика-математика бағытындағы Назарбаев Зияткерлік мектебі 2014 жылдың 12 желтоқсанында ашылды. Алыс аудандардан келіп білім алатын балалардың 120 орындық жайлы жатақханада тұруына мүмкіндіктері бар.
- Петропавл қаласы. Петропавл қаласындағы химия-биология бағытындағы Назарбаев Зияткерлік мектебі 2015 жылдың 4 шілдесінде ашылды. 720 орынға арналған білім мекемесі қаладағы жаңа «Береке» шағын ауданында бой көтерді. Мұнда аудандардан келген оқушыларға арналған 120 орынды жатақхана бар.
- Ақтау қаласы. Химия–биология бағытындағы 2015 жылдың 27 тамызында ашылды. 720 балаға арналған зияткерлік мектеп облыс орталығының 33-шағын ауданында орналасқан. Алыс-шалғай елді-мекендерде тұратын балалар үшін мектеп 120 балаға арналған жатақхана бар.
- Түркістан қаласы. Түркістан қаласындағы химия-биология бағытындағы Назарбаев Зияткерлік мектебі 2021 жылдың 26 қарашада ашылды. 720 орынға арналған білім мекемесінің 360 орынды асханасы бар. Мұнда аудандардан келген оқушыларға арналған 120 орынды жатақхана бар.
Еншілес ұйымдары мен филиалдары
- «Педагогикалық өлшеулер орталығы» филиалы
- «Білім беру бағдарламалары орталығы» филиалы
- «Педагогикалық шеберлік орталығы» жекеменшік мекемесі
- «NIS Ақпараттық технологиялар және қызмет көрсету орталығы» жеке мекемесі
- «Даму қоры» корпоративтік қоры
- «BeyimTech» жауапкершілігі шектеулі серіктестігі
- «Республикалық физика-математика мектебі» КеАҚ (50%)[10]
Назарбаев Зияткерлік мектептеріндегі Wikipedia клубы
Назарбаев Зияткерлік мектептерінің оқушылары Wikipedia ғаламдық жобасына қосылып, өздерінің Wikipedia атты клубын ұйымдастырды. Wikipedia клубының белсенді қатысушылары жыл соңында Wikimania конференциясына барып қайтады.
Сыртқы сілтемелер
Дереккөздер
- ↑ Мектептер порталы Мұрағатталған 12 ақпанның 2014 жылы.
- ↑ ҚР Еңбек және халықты әлеуметтік қорғау министрлігі, «Назарбаев Зияткерлік мектептері» - орта білімдегі жаңа өсу нүктелері
- ↑ https://www.instagram.com/p/Cpb-68LItSm/?igshid=YmMyMTA2M2Y=
- ↑ Открылась первая президентская интеллектуальная школа
- ↑ Семей қаласындағы Назарбаев Зияткерлік мектебі,16.02.2013
- ↑ Талдықорған қаласында физика-математикалық бағыттағы Н.Назарбаев зияткерлік мектебі Мұрағатталған 29 қарашаның 2014 жылы.,16.02.2013
- ↑ Өскемендегі Назарбаев зияткерлік мектебі Мұрағатталған 6 мамырдың 2021 жылы. 16,02,2013/
- ↑ Шымкент қаласында мектептің ашылуы Мұрағатталған 15 ақпанның 2013 жылы., 16.02.2013
- ↑ Ақтөбеде Назарбаев зияткерлік мектебі ашылады Мұрағатталған 9 қаңтардың 2014 жылы., 16.25.13
- ↑ Еншілес ұйымдар және филиалдар