Ғылым халық шаруашылығын дамыту қызметінде (мақала)

Ғылым халық шаруашылығын дамыту қызметінде – Қаныш Сәтбаевтың мақаласы. 1989 жылы «Ғылым» баспасынан шыққан «Ғылым мен мәдениет туралы таңдамалы мақалалары» жинағына, 2007 жылы «Оңтүстік полиграфия» баспа үйінен шыққан шығармалар жинағының 1-томына енген. Республикамыздың байтақ жерінің қойнауы сансыз байлыққа толы.

Қазақстан хром мен ванадий кенінің қоры жөнінде бүкіл дүние жүзінде алдыңғы орындардың біріне ие болып, мыс пен мырыш, қорғасын мен молибден, кадмий мен вольфрам және басқа кен байлығы жөнінен Одақта бірінші орын алады. Сол сияқты Қазақстанда темір мен көмірдің, мұнай мен марганецтің, фосфориттердің, сирек және шашыранды металдардың сарқылмас қоры бар.

Сондықтан Кеңес халқы Қазақстанды «еліміздің қазыналы қоймасы» деп атайды. Ғалым осыларды айта келіп, қазір энергетикалық базаны жоспарлы түрде дамытудың ең тиімді әдісі бірыңғай энергетикалық жүйе жасау болып табылатыны, оның ішінде Қазақстанның солтүстік-шығыс аудандарын қамтитын энергетикалық жүйе құру ісін толығынан жүзеге асыруға болатыны, Алтай мен Семей, Павлодар мен Қарағанды, Ақмола мен Қостанай, Көкшетау мен Петропавл энергия тораптарын біріктіретін жүйе республиканың ең негізгі өнеркәсіпті аймағын, тың игерген аудандарды электр энергиясымен қамтамасыз ететіні, алдағы жетінші бесжылдықта бұл міндетті орындауға толық жағдай жасалатыны, өйткені ол кезде Ертісте Бұқтырма мен Шүлбі электр станциялары салынатыны, Павлодар мен Қостанайда аса қуатты энергетика тораптары жасалатыны, тағы басқалары жөнінде әңгіме қозғайды.